Nagdilaab sa pag-alagad

MATI CITY – Ikaduha palang nga diocesan convention sa mga kaabag sa diyosesis sa Mati niadtong Mayo 22-24, 2014 nga gipahigayon sa San Vicente Ferrer parish sa Lupon, Davao Oriental ug Maryknoll High School of Lupon, apan nakita ang “kalayo sa Balaang Espiritu nga nagduso sa tagsa-tagsa kanila ngadto sa pagbag-o sa kaugalingon paingon sa pagbag-o sa matag Gamayng Kristohanong Katilingban (GKK).”

Kini ang giluwat ni Fr. Bernard Albao, ang diocesan director sa kaabag-lectors apostolate sa usa ka pakighinabi sa DXHM balitang simbahan, kabahin sa nakit-ang misyonaryong hagit sa ministriya sa dul-an usa-ka-libo nga nanambong gikan sa tanang 19 ka mga parokya sa diyosesis, dugang sa pag-ingon nga “posibleng gi-uhaw ug nangandoy gyud sila alang sa usa ka dakong panagtapok sa ilang ministriya sukad nahitabo ang unang diocesan kaabag convention sa tuig 2006 sa parokya ni San Francisco Javier sa Sigaboy sa pagpanguna ni Fr. Ricky (Ricardo Siblos), hinaut matagbaw gyud sila sa Ispiritu aron mahingusgan ang ilahang pag-alagad sa katawhan sa Diyos.”

Nitabang ang dinapit nga mamumulong nga si Fr. Edilberto “Loloy” Mahinay gikan sa Regional Major Seminary sa Davao (Remase) sa pagdugang sa mga Ispirituhanong pagdasig pinaagi sa iyang presentasyon sa tema nga: “Gitawag nga Mahimong Santos, Ipadala nga Bayani.”

Sa ilang Welcome Concelebrated Mass nga gipangunahan ni Obispo Patricio H. Alo, ang presider nagbukas sa diwa sa “pagsangyaw ug pagkaabierto sa grasya sa Balaang Espiritu aron bisan-asa mang dapit sa kalibutan, o bisan asa kamo mag-alagad, taliwa sa klase-klaseng kalibutanong pagsulay, malitok ug mabuhat ninyo ang pinasubay sa pulong sa Diyos tungod kay gituoon ug gitun-an man ninyo ang Iyang kamatuoran ug gugma nga mao say dalan ni Hesukristo.”

Ang mga hamtong magpaka-bayani  ang nagpabilin usab nga sulundon sa mga palisiya aron nga mahimong hapsay ug han-ay ang dagan sa ilahang convention—sa ilang pagsuot sa kolor sa ilang t-shirt, paglikay sa pagpanigarilyo ug paglabay og basura sa palibot, dili maatrasado ug magpunay pagtext-text sa mga session, ubp, lakip sa ilang sports ug socials.

Mapasalamaton ang nagkadaiyang coordinator ug si Fr. Albao sa manggihatagong pagdawat kanila sa host parish ug ni parish priest Fr. Edito Baño, ug ingon man sa tanang mga kura paroko nga nahimong kabahin sa kalampusan sa 2ndKaabag Convention sa Diocese of Mati.

Padayon sa Pagdilaab sa kasing-kasing mga bayani sa Dios !