Pag-organisa og Vicariate Disaster Response Team gilantaw

Aron makatabang sa katawhan sa pagpangandam panahon sa mga kalamidad, gilantaw sa Archdiocesan Social Action Center Davao ang pagtukod og Vicariate Disaster Response Team (VDART).

Sa gipahigayong meeting sa ASAC Davao office niadtong Hunyo 7, kapin 40 ka mga representante sa mga vicariates sa Archdiocese of Davao ang mitambong aron mag-brainstorming mahitungod sa pagmugna sa VDART nga maoy team nga mu-responde panahon sa mga kalamidad ug maoy makig-coordinate sa Central 991 sa syudad sa Dabaw.

Nahibaw-an sa maong panagsabot ang ka-importante sa paghimo og survey ug profiling sa mga lugar nga gipuy-an sa katawhan diin makita kung adunay mga hulga sa mga pagbaha, landslides, sunog ug uban pang klase sa mga kalamidad.

Tumong usab sa VDART nga adunay mga volunteers nga andam muhatag sa ilang kahanas ug panahon sa mga ipahigayong meeting ug disaster response initiatives sama sa first aid, feeding sa mga biktima sa kalamidad, mag-repack sa mga relief goods, mag-edukar bahin sa first aid ug disaster response, evacuation ug uban pa.

Kung malampuson ang pag-organisa sa vicariate level, gihinaut sa ASAC nga makanaug kini sa parish level aron mas epektibo ang pag-responde sa mga kalamidad ug dili na angay nga mohulat nga maigo og kalamidad ang mga parokyano sa matag parokya.