Raffle para sa Bag-ong Clergy House sa Mati gipahigayon

MATI CITY—Nagpahigayon ang Diocese of Mati og raffle draw sa Hunyo 7, alang sa construction sa bag-ong clergy house.

Gihimo kini sa San Nicolas de Tolentino Cathedral human sa kasaulogan sa Santos nga Misa alas 9:00 sa buntag, nga gipangulohan ni Obispo Patricio H. Alo, D.D. atol sa ika-33 nga kasumaran sa iyang pagka-Obispo, kon 33rd Episcopal anniversary.

Mga premyo nga nadaog mao ang: 1st prize-XRM motorcycle, 2nd prize- Honda Wave Motorcycle, 3rd prize-32” color TV ug consolation prizes nga five units Nokia cellphones ug 10 sacks of rice.

Ang pagbola sa mga stubs gitakdo usab sa ground-breaking sa bag-ong Clergy House, sa pagduso ni Sr. Melvin P. Manligoy, CSJ, diocesan oeconomus, kinsa naglantaw sa hinanaling panginahanglan sa usa ka mas dakong puluy-anan sa kaparian nga dili komportable sa kasamtangang Clergy House diin nanghuot gayud sila, bisan pa man kung ang mga opisina sa ubos ang gi-convert na sab ngadto sa mga lawak sa kaparian.

Kini usab tungod sa pagdaghan sa bilang sa mga kaparian sulod sa 30 ka tuig, kon diin sa kasaysayan sa diyosesis, mga onse ka buok lang ang diocesan clergy niadtong 1984 nga nag-alagad sa siyam (9) ka parokya ug karon kapin 40 na sila sa 19 ka mga parokya.

Gilaraw sa presbyterium ang dugang pa nga mga kalihukan alang sa pagsuporta sa dakong galastuhon sa Clergy House construction, ug ang business office abierto usab sa pagdawat og mga donasyon gikan ni kinsa mang buot mutabang. Mahimong ma-contact ang Clergy House Office sa telephone no: (087) 388-3707. (@dcherald)