Reincarnation vs. Resurrection

Ang gitudlo sa New Age Movement mahitungod sa reincarnation sukwahi sa resurrection nga gitudlo sa atong Simbahan. Sa reincarnation gipasabot nga inigkamatay sa tawo ang iyang kalag (sumala sa iyang ang-ang /kahimtang) mobalhin ngadto sa plant kingdom, o sa animal kingdom, o sa human kingdom, hangtod moabot sa Kingdom of God o kahingpitan.

Sumala sa Heb. 9:27, “ Kinahanglan mamatay ang tagsatagsa sa makausa, ug tapos niana hukman siya sa Dios.” Ang kalag sa tawo dili magbalhin-balhin ngadto sa mananap o ngadto sa laing tawo. Gani, ang ginoo nagsulti kang Dimas, “Sultihan ko ikaw, karong adlawa adto ka sa Paraiso uban kanako” (Lk. 23: 43) sa 1 Ped. 3: 19, “ug sa iyang espirituhanong kahimtang miadto siya ug nagwali sa mga espiritu nga nabilanggo.” Si haring Saul nga nagpakamatay ug ang iyang tolo ka anak nga gipatay sa mga kaaway ( 1 Sam. 31: 4-6), nahimutang ang ilang mga kalag uban kang Samuel nga propeta (1 Sam 28: 19). Kini nagpasabot nga ang kalag sa tawo dili magbalhin-balhin ug kausa lang mamatay ug hukman sa Dios ang tawo human sa pagkabanhaw sa kataposang adlaw.

Ang pagkabanhaw sa tawo adunay kalabutan sa duha ka sacramento: Sa bunyag ug sa Eukaristiya, mabasa sa Rom. 6:3-5, “ … sa pagbunyag kanato nahiusa kita kang Kristo Jesus, ug busa nahiusa kita sa iyang kamatayon. “ – “ Kay kung nahiusa kita kaniya sa iyang pagkamatay mahiusa usab kita kaniya kung banhawon na kita ingon nga gibanhaw siya.” Sa Juan 6: 54, “Ang mokaon sa akong unod ug moinom sa akong dugo may kinabuhing walay kataposan ug banhawon ko siya sa kataposang adlaw.” Mao kini ang hinungdan ngano nga ang bata kinahanglan mabunyagan.

Sa reincarnation gipasabot nga dunay kahingpitan sa kalag apan walay resurrection. Bisan sa panahon ni Kristo ug sa panahon sa mga apostoles dunay mga tawo nga dili motuo nga dunay resurrection. Ang kadaghanan sa mga katoliko nga dili suhito sa Biblia malagmit mao ang daling madani sa New Age movement nga kusog karon sa mga nasud sa Europa. Gani, adunay mga katekista nga nadani ngadto sa laing mga secta. Busa, mas maayo nga ang pagtuon sa atong katesismo labkbitan pod nato ang nahasulat sa Biblia kay kini mas importante kay sa atong kaugalingong panghunahuna o idia.