Sa pagsaulog sa Pentekostes og pagpadayon sa pagsangyaw On-air Charismatic Program, Giplanuhan

Nakapadasig ang presentasyon sa San Pedro Cathedral sa dihang gibuhi nila ang istorya sa Bibliya sa pagkunsad sa Espirito Santo ug sa paghatag ug kaisug sa mga apostoles ug disipulo sa pag-ayo sa masakiton og sa pagsangyaw sa Maayong Balita. Kini mas nasabwag pa unta kon adunay Live Radio Coverage nga ipahitabo atol sa selebrasyon. (Photo: Cheng Vilog)   

“Ang Hiyas sa Espirito Santo, Kalig-on sa Pag-alagad.”

Mao kini ang temang ginamit sa Archdiocesan Service Committee – Catholic Charismatic Renewal of Davao (ASC-CCRD) sa pagsaulog sa Pentekostes niadtong Domingo, Hunyo 8 diha sa Christ the King Formation Center, Bago Aplaya, Davao City.

Human sa Misa sa San Pedro Cathedral, nanguna si Fr. Jorge Angga sa paghatag sa iyang mensahe sa mga nanambong.  Wa usab nawala ang tinuig nga Fellowship Lunch,Praise and Worship ug mga presentasyon gikan sa Shalom Community, San Miguel Parish, Assumption Parish, MOPH, St. Joseph, San Pedro Cathedral, Lord’s Flock, Jesus of Nazareth Community, ug uban pa.

Matud pa ni Abraham Domingo, kasamtangang coordinator, “Adunay 30 kaaktibong communities sa pagkakaron dinhi sa Davao.  Sa akong ikaunom ka tuig, natabangan namo sa core group nga mabalik ang prayer meetings sa 5 kaparokya sama sa Fatima, Peñaplata, Bunawan, Lasang ug Ma-a.

Padayon usab ang healing seminars sa vicariates. Naninguha pud mi nga makapatukod ug bag-ong CR karong bulana aron magamit sa 3rd monthly gathering dinhi.  Unta matuman pud ang 1st DADITAMA Charismatic  Congress sunod tuig.  Naapuy nag-suggest nga pari sa amo nga mukuha ug radio slot inig abli sa atong radio. 

Kini makatabang sa padayon namo nga pagdani hilabi na sa mga daang miyembro, though importante man sad ang personal nga pagbisita.  Bag-o lang mi nakahuman dinhi sa CLSS uban ang 33 ka mga batan-on gikan sa GKK sa San Lorenzo Parish, Talomo. 

Sa pagbutang ug Charismatic Program, si Paul Kent Pancho gikan sa Queen of Peace GKK ug Jesus of Nazareth Community miingon: “Kung mukuha man ta ug slot, ang unod unta mga testimonies ug live praise and worship.  Makatabang ko sa pagpagpromote sa programa diha sa mga activities.  Kada Pentecost celebration, ang apostoles nga si John nga nagpabilin uban ni Maria, ang permanente nakong mahinumduman.  So, dili lang diay ko taman sa pagtuo lang.  Ubanan dapat nako ug aksyon.”

Nanghinaut usab si Roger Jabilles gikan sa GKK Christ the King sa Panacan nga, “Mahatagan pud usab ug atensyon ang pagmugna ug Singing Ministry nga makita sa TV o madunggan sa radyo.  Importante kini kaya duna kitay krisis sa pagtoo run.  Word of God plus Singing Ministry, maskin ang mga dili Karismatik, madala g’yud.Kusog kaayo ang Charismatic niadtong 1980s apan karon, naa na sa layo ang uban, naminyo na ang uban, nawad-an na jud ug gana sa fellowship ang pipila.  Apan positiboko, marevive gihapon ni sa Katoliko.”