Tigpakalawat gipadala sa Kaputian

Aron ipakita ang ilang kagustohan nga mahimong takus sa pagpakalawat sa katawhan panahon sa Misa, mitambong ang dose ka Extraordinary Ministers of Holy Communion sa gipahigayong sending forth sa Sto. Niño Parish, Kaputian, Island Garden City of Samal.

Ang pagpadala gihimo sulod sa Misa niadtong Hunyo 22, diin gisaulog ang Corpus Christi. Gipangulohan ni Fr. Rico Enriquez, kura paroko sa Kaputian ang Misa nga gitambongan sa mga extraordinary ministers of holy communion nga sila si Edgar Adante, Esperedion de la Fuente, Jose Zaldy Esmero, Juan Esperanza, Alfredo Esteban, Cleofe Longas, Gil Omana, Allan Oson, Ronaldo Respuesto, Teodulfo Reyes, Antonio Ruta ug Reynald Zamora.

Malipayon usab nga gisaulog niadtong adlawa ang ika-32 nga Foundation Day kon Parish Day sa Kaputian.

“Ako mapasalamaton nga mitahan kining mga igsoon nato nga mangalagad sa simbahan isip extraordinary ministers of holy communion. Hinaut nga mas molawom pa ang ilang debosyon sa lawas ug dugo ni Kristo diha sa pagtabang nila sa pag apod apod niini sa mga kaigsoonan,” sumala pa ni Fr. Enriquez sa pakighinabi sa Davao Catholic Herald.