29th Kadayawan Festival, gipangandaman na!

Malipayon nga gipadayag ni Councilor Al Ryan Alejandre ang mga aktibidades ug mga pahalipay alang sa umaabot nga ika-29 Kadayawan Festival karong Agosto 11-17.

Labot sa mga aktibidades sa Kadayawan ang Tunog Mindanao, Sayaw Mindanao, Hiyas sa Kadayawan og Pamulak sa Kadalanan.

Luyo sa mga naandan nga paga-himuon sa maong selebrasyon, adunay mga kausaban sama sa dili pagtukod ug entablado sa dalan San Pedro alang sa mga mosayaw sa Indak-Indak sa Kadalanan. Kini aron ipakita nga para sa kadalanan gayod ang maong aktibidad.

Aduna usab ihatag nga 50% nga diskwento sa mga bulak ug prutas sa ipahigayon nga Agri Trade Fare. Usa sa mga discounted nga bulak ang “endemic” kon sa Davao lang makita nga Waling-Waling orchid og ang prutas nga Durian.

Aduna usab lain nga kalingawan makita sa nagkalainlaing dalan sa siyudad sama sa Ka-an sa Da’an og Yugyugan sa Parke.

Gipangandaman na sa DRRMC kon Davao City Risk Reduction Management Council ang mga medical emergency services alang sa mga motambong sa umaabot nga 29th Kadayawan Festival karong Agosto 11-17.

Matud kay Emmanuel Jaldon, Davao Central 911 Chief og DRMMC Officer-in-Charge (OIC) atol sa i-Speak Media Forum nga aduna sila 150 ka tawo nga mopuli-puli aron mag-monitor sa nagkalainlaing aktibidades nga mahitabo sa maong pagsaulog.

Aduna usab mga ambulansya sa 911 nga ipakalat sa nagkalainlaing dapit sa tibuok siyudad sa Davao.

            Ang tema sa pagsaulog sa Kadayawan karong tuig mao ang “Kalambiang sa Kinaiyahan: Kadayawan sa Katawhan” (“Nature’s Flourishing: People’s Well Being”).