Bayanihan, usa sa pagpangandam sa kapistahan sa Calinan Parish

Tulo ka sabado sa Hulyo ipahigayon sa mga taga Calinan ang bayanihan karong July 5, 19, ug 26 aron limpyohan ang palibot sa simbahan alang sa moabutay nga fiesta.

Kini ang usa sa pagpangandam sa ika-64 nga kapistahan sa Most Sacred Heart Parish karong Agosto 1.

Matud ni Fr. Arnel Tadeo, Parish Priest han-ay na ang mga kalihokan isip preparasyon sa Parochial Fiesta. Sa July 12 ipahigayon ang Parish Day. Sa July 20 mao ang Confirmation Day nga pangulohan ni Archbishop Romulo G. Valles sa alas otso sa buntag.

Magsugod ang ilang Novena karong July 23 hangtod 31 sa alas 4:30 sa buntag, gawas sa July 31 nga magsugod ang misa sa alas 5 sa buntag tungod sa prosesyon ug alas singko sa hapon sa maong adlaw ang anticipated mass uban sa mga pari nga gikan sa Calinan.

Sa adlaw sa kapistahan magsugod ang misa sa alas singko sa buntag sundan sa alas sais y medya nga Misa, ug sundan usab sa alas otso nga misa ni Archbishop Valles, ug sa alas diyes mao ang katapusang misa anang adlawa, ug sa alas onse y medya ipahigayon ang bunyag.