Botika sa Parokya nagpadayon

Aron mas mapalambo pa ang pagserbisyo sa mga parokyano, gihatagan karon og pagtagad sa Archdiocesan Social Action Center (ASAC) Davao ang mga parokya nga adunay Botika sa Parokya.

Ang Botika sa Parokya usa sa mga proyekto sa ASAC diin makapalit ang mga parokyano og mga tambal sa klase-klaseng mga balatian sa mas barato nga presyo.

Sa pakighinabi sa DCHerald kay Sr. Marissa Arado, TDM, gikan sa ASAC Davao, gisuroy nila ang pipila ka parokya sa Dabaw nga adunay Botika sa Parokya aron mahibaw-an kung unsa ang kasamtangang kahimtang niiini ug unsa ang mga kalisdanan sa pagpadagan sa maong proyekto.

Nasayran nga adunay uban nga gina-adto gayud sa mga parokyano ilabi na didto sa mga lagyo kon rural areas nga mga parokya tungod barato ang mga tambal ug duol kini sa ilaha kung ikumpara sa mga botika sa mga parokya nga anaa sa sentro dapit sa syudad diin adunay daghang ubang botika nga pwede nila mapalitan og tambal.

Nasayran usab ni Sr. Arado nga mas nagalambo ang mga botika sa parokya nga gisuportahan sa ilang mga kura paroko ug gihimo kining usa sa mga priority projects sa ilang tagsa-tagsa ka parokya.

Sa pagkakaron nagapadayon ang pag-monitor ug pagsuroy sa ASAC Davao sa nagkalain-laing parokya sa Artsidyosesis sa Dabaw. Nabisita na sa ASAC ang mga parokya sa Most Sacred Heart sa Calinan, Holy Family sa Baliok, San Lorenzo sa Talomo, San Antonio de Padua sa Agdao, St. John the Baptist sa Lasang, ug Sta. Ana niadtong Hunyo 21 ug 24.