Parish tindahan sa La Verna gisugdan

Gipanalanginan sa Kura Paroko sa St. Francis of Assisi Quasi-Parish sa La Verna Subdivision, Buhangin ang ilang bag-ong Parish Tindahan kon livelihood center niadtong Hunyo 29.

Si Fr. Orlando Angelia, kura paroko maoy nangulo sa blessing kon panalangin sa Parish Tindahan diin mapalit ang mga produkto sa mga Gagmay’ng Kristohanong Katilingban (GKK) sama sa tocino, chorizo, bags, rags, ug uban pang mga produkto.

Gihimo ang blessing human sa misa sa alas 7 sa buntag niadtong Domingo.

Gipangunahan ni Fr. Angelia ug Sr. Marissa Arado, TDM, gikan sa ASAC Davao ang ribbon-cutting ceremony sa maong tindahan nga naglantaw nga makaserbisyo sa mga parokyano samtang nagatabang sa mga GKK sa pagpundo sa mga proyekto sa mga miyembro.

Kahinumduman nga bag-o lamang gideklara isip quasi-parish ang St. Francis of Assisi sa La Verna niadtong Setyembre 2013. Si Archbishop Romulo G. Valles ang nangulo sa Misa ug rite of canonical establishment.