Save the Coconut Movement: Cocolisap pesticide delikado

Tungod sa makadaut nga epekto sa paggamit og pesticide sa pag-kontrol sa Cocolisap nga naga-atake sa mga plantasyon sa lubi sa nasud, gisulong sa usa ka grupo ang paghunong sa paggamit niini ug pagbalik sa tradisyonal nga paagi.

“Say No to Neonicotinoids” kini ang gisulong na adbokasiya sa SAVE THE COCONUT MOVEMENT, usa ka grupong adunay misyon nga tabangan ang mga mag-uuma sa atong nasod sa tradisyonal na pamaagi.

Sa gipahigayong Kapehan sa Dabaw press conference sa SM Ecoland, Annex Building, niadtong ika-7 sa Hulyo, miingon si Edgar B. Eugenio, founder sa maong grupo nga suportado nila ang tradisyonal na pamaaging gihimo sa Philippine Coconut Authority (PCA) sama sa organic spraying, pruning, biological control ug organic fertilization.

Ang Neonicotinoid Pesticide usa ka kemikal nga mupatay sa insektong gitawag nga “COCOLISAP” apan sa pag gamit niini adunay negatibong epekto sa mga plantasyon sa lubi ug sa uban pang mga umahan. Ang maong insekto mukalat pinaagi sa hangin. Kaniadtong 2010 nadiskubre ang maong insekto sa mga lugar sa Cavite, Laguna, Batangas, Rizal, Quezon (CALABARZON).

Sumala ni Eugenio, sa karon 60 pursyento sa mga plantasyon sa CALABARZON ang apektado niini.

Matod pa ni Dennis Lainez, co-convenor sa maong grupo nga 3.5 milyones nga mag-uuma ang apektado niini. Dako ang tabang sa industriya sa lubi sa nasud tungod mukita og P 2 bilyones sa exportasyon.

Aron mapugngan ang pagkalat niining insekto mihimo ang gobyerno ug aksyon  pinaagi sa containment, control ug pag quarantine sa mga seedlings sa lubi, dungag pa na muagi pa kini ug 14 checkpoints aron masigurado ang kalidad bag o mapadala sa mga nagka lain-laing dapit sa nasod.