Ang Pagsaka sa Langit ug Pagka-Rayna ni Birheng Maria

(Assumption and Queenship of Blessed Virgin Mary)

Agosto 15 atong ginasaulog ang usa sa pinaka-dako nga kapistahan sa atong Simbahan, ang Pagsaka ni Birheng Maria Lawas ug Kalag ngadto sa Langit ug Agosto 22 ang iyang Pagka-Rayna sa Langit ug sa Yuta. Gatosan na ka mga katuigan ang nanlabay, ang Simbahang Katoliko kanunay nagatamod ug nagasaulog sa kapistahan sa pagsaka ni Birheng Maria sa langit human sa iyang kinabuhi dinhi sa kalibutan.

Kini nga kamatuoran dugay nga giwali ug gitohoan sukad pa sa unang siglo. Busa si Papa Pio XII niadtong Nobyembre 1, 1950 midiklarar niini nga pagtulun-an isip opisyal ug usa ka dogma sa atong pagtoo (Dogma of Faith). Iyang gisulat sa Papal Bull nga giulohan ug Munificentissimus Deus: “By the authority of our Lord Jesus Christ, of the Blessed Apostles Peter and Paul, and by our own authority, we pronounce, declare, and define it to be a divinely revealed dogma: that the Immaculate Mother of God, the ever Virgin Mary, having completed the course of her earthly life, was assumed body and soul into heavenly glory”

Ang Pagsaka sa Langit ni Birheng Maria lawas ug kalag nagagikan gayud diha sa pagtoong Katoliko nga siya walay buling sa sala ug hinlo gayud. Usa kini ka dakong pribilihiyo kaniya sanglit siya maoy napili nga Inahan sa Dios (Lucas 1:43). Kining   pagtooha nga si Maria misaka sa langit lawas ug kalag lig-ong gipahimug-atan sa Bibliya.

Sa Daang Tugon, adunay mga panagna nga ang Ginoo mobangon sa iyang lubnganan, mosaka sa langit uban ang Sudlanan sa Kasabotan (Salmo 132:8). Kini nga sudlanan sa kasabotan nga gihisgutan walay lain kondili si Birheng Maria. Sa Pinadayag: “Unya nagpakita ang usa ka dakong tilimad-on didto sa langit; may usa ka babaye nga nagbisti ug adlaw ug nagtunob sa bulan ug gikoronahan siyag 12 ka bitoon” (Pinadayag 12:1).

Sa samang rason nakita ni San Juan Apostol ni Kristo ang pagsaka ni Birheng Maria sa langit. Si San Juan maoy nag-amoma pagbantay kang Birheng Maria sa katapusang adlaw niya sa Ephesus. Busa kini nga pagtulun-an dayag gayud diha nga natala sa kasulatan ug gikinahanglan nga atong tohoan.

Ang Pagka-Rayna ni Birheng Maria giproklamar usab niadtong 1954 ni Papa Pio XII  pinaagi sa iyang Encyclical Letter nga giulohan ug Caeli Reginam. Kini nga kasaulogan adunay doul nga kalambigitan sa pag-ila sa pagsaulog nato sa pagsaka ni Birheng Maria sa Langit o Assumption of Mary. Human siya misaka sa langit siya gikoronahan isip Rayna sa Langit ug Yuta.

Ang pagka-Rayna ni Birheng Maria nahibasi usab sa mao gihapong panan-awon ni San Juan Ebanghelista sa Pinadayag 12:1: “Unya nagpakita ang usa ka dakong tilimad-on didto sa langit may usa ka babaye nga nagbisti ug adlaw ug nag-tunob sa bulan  ug gikoronahan siya ug 12 ka bitoon”.

Kining tanang pribilihiyo gihatag lamang kang Birhen Maria tungod sa iyang dakong partisipasyon sa pagpakatawo sa Anak sa Dios (Galacia 4:4) nga maoy niluwas kanato, ug maoy napiling Inahan sa Dios (Lucas 1:43). Labing dako ang kahimayaan sa hilabihang kaputli niya nga lawas diin kini ang insakto ug talagsaon kaayo gumikan sa iyang pagka-hingpit ug pagka-putli.

Siya karon ang nakig-usa na kang Kristo diha sa kahimayaan sa pagdaug sa sala ug sa mga daotang bunga niini. Kini nga mga pagtulun-an, mga pribilihiyo nga gihatag sa Dios kaniya, apan wala kini nagpasabot nga siya usa na ka diosa sama sa ginaingon sa mga laing sekta nga tungod sa pagka wala nilay grasya dili nila ni madawat nga kamatuoran.a

Si Maria angay gayud hatagan niining maong pribilihiyo tungod sa hinungdan nga pinaagi kaniya nadawat nato ang kaluwasan, pinaagi sa pagdawat niya nga diha ipakatawo ang Anak sa Dios. Diha kaniya kuhaon ang lawas ug dugo nga maoy gibuhat nga instrumento aron ang maong lawas ug dugo nga iyang giula maoy niluwas kanato sa kaulipon sa sala,(Heb. 10:9 ug Gal. 4:4).

Kung wala gidawat ni Maria ang maong tanyag sa Dios siguro hangtud karon wala pa nato madawat ang lihok sa pagpangluwas, apan dili gayud kana mahitabo kay si Birheng Maria apil na sa plano sa Dios sukad pa sa daang tugon (cf.Gen. 3:15).