Isangon ang akong yugo

Sa Mt. 11:29, ang Ginoo nag-ingon, “Isangon ang akong yugo…” Si Cardinal Tagle, diha sa usa ka interview sa programa sa telebisyon, nag-ingon nga ang “yoke” (yugo) nagpasabot “gugma” apan wala na kini niya isaysay. Busa, angay nga atong pamalandongan tungod kay wala ako makabasa og libro ni makadungog og homiliya nga nagpasabot kung unsa kining yugo sa Ginoo nga buot Niya nga atong isangon o batonan diha sa atong kaugalingon.

Sa atong nahibaloan, ang kalabaw ug baka mao ang mogamit og yugo. Pinaagi sa yugo iyang maguyod ang balsa/kanga o karomata nga dunay mga kargamento. Ang yugo nga anaa sa liog mao makatabang aron iyang madala ang daghan ug mga mabug-at nga mga kargamento. Sumala sa mga istorya, sa America dunay “Boys Town” ug dunay monument sa usa ka bata nga nagpas-an og laing bata nga mas dako pa nga bata. Sa ubos dunay nahasulat, “He is not heavy. He is my brother.” (Siya dili bug-at. Siya akong igsuon).

Kita usab kung dunay yugo ug gugma, kini mao ang maghatag og kasayon sa pagpas-an sa atong obligasyon ngadto sa uban. Ang atong kaugalingong gugma kinahanglan nga mokaylap kini ngadto sa atong pamilya, higala, sa ubang tawo, apil na ang mga kaaway. Ang kakulang sa gugma mao ang hinungdan sa kakulang sa kalinaw ug kakulang sa kalipay. Si San Pablo nag-ingon, “ang tibuok lawas motubo ug malig-on pinaagi sa gugma.”  (Efeso 4:16) Gipasabot ni San Pablo nga ang ‘lawas’ dili lang ang Simbahan kundili ang lawas pod nato kay kita sakop man sa Lawas ni Kristo.

Dili nato ikalimod nga ang atong pagbati o gugma dili sama ang gidak-on alang sa tanan. Busa nagkinahanglan nga padayon kita sa pagtubo pinaagi sa kausaban sa atong kina-iya ug pamatasan. Kung kita pataka lang og labay o bilin sa atong kaugalingong basura labi na sulod sa simbahan, nan, wala pa kita makakat-on sa pagrespeto sa ubang tawo. Dili gayod kita motubo ngadto sa gugma ug pagkamakaloloy-on kung dili kita makakat-on sa pagrespeto sa katungod sa ubang mga tawo.

Ang atong lawas motubo pinaagi sa pagkaon ug vitamins. Ang atong gugma motubo pinaagi sa paghago sa pagtuon, sa pag-ampo ug sa mga pagsulay nga atong masinati samtang buhi pa kita. Ang gidak-on sa atong gugmas naga-agad sa gidak-on sa atong kasantos o kinabuhi gikan sa Ginoo. Ang Ginoo nag-ingon, “Mianhi ako aron makabaton sila og kinabuhing madagayaon.” (Jn. 10:10)