Ang Sacramentals (Part 1 of 2)

(Unsa ang kahulogan ug kamahinungdanon sa pagtamod nato ug Holy Water o bendita, Scapular, Krusipiho, Ashes o Abo, Kandila ug uban pa?)

Usa sa mga maayong lihok ug pamatasan nga ginabuhat natong mga Kristohanong Katoliko mao ang pagtamod nato ug mga gipanalanginang mga balaang butang o blessed objects sama sa pagsul-ob ug SCAPULAR ug MEDALYON, pag-gamit ug KRUSIPIHO, pagbaton ug ROSARYOHAN, pag-gamit ug KANDILA ug  BENDITA o HOLY WATER, pagpabutang ug abo o ASHES sa agtang ug uban pa. Apil niini ang atong mga lihok sama sa pagpanguros, pagyukbo, pagluhod ug uban pang mga balaanong mga lihok o holy actions. Kini gitawag sa atong Simbahan nga SACRAMENTALS, diin makatabang kini sa pagpalambo ug pagpalalom sa atong espiritohanong debosyon ngadto sa Dios. 

Ang Sacramentals sagradong timaan nga gitukod sa Simbahan (cf. CCC par. 1677 page 469, Mateo 16:19 ug Mateo 18:18). Usa usab kini nga  makitang timaan o outward sign (Blessed objects and holy actions), nga gipanalanginan sa atong Simbahan sa tinguha nga makahatag kini ug mga panalangin sa matag-usa nga kinasing-kasing, tinud-anay ug maampoon nga pagtamod ug pag-gamit niini.

Diha sa balaang kasulatan ang atong Ginoong Hesukristo naghatag ug mga ehemplo sa pagbuhat ug mga panalangin alang sa mga balaang butang ug mga balaang lihok o sacramentals. Busa ang kasulatan wala nagadili niini kay mismo ang Ginoo maoy unang nagabuhat niini sama sa paghatag niya ug mga panalangin sa mga tinapay ug isda (cf. Mateo 14: 18-20), panalangin sa mga kabataan (cf. Mateo 18:1-6), ug panalangin sa iyang mga tinun-an (cf. Mateo 10:1-11). Mihatag usab siya ug gahum sa mga Apostole sa pagpahawa sa dautang espiritu (Marcos 16:17, Lucas 9:1, 10:1). Busa dili dautan kon maghupot kita ug mga balaanong butang nga ginapanalanginan kay usa kini ka hiyas sa pagpakita ug relihiyosong pamatasan ug labaw sa tanan mapalalom ang atong debosyon ug ma-protektahan kita sa mga dautang espiritu nga molingla kanato ug makapugong kita sa pag-buhat ug dautan kon anaa kita niini, kay mohatag usab kini ug pahinomdom kanato sa mga birtud sa pagka- matarong ug aktwal nga grasya (actual grace). 

Pahinumdom sa tanan nga ang Simbahan nagtudlo nga gamiton ang Sacramentals o mga balaang butang uban sa saktong pagtoo ug sakto nga pag-debosyon lamang ug dili gamiton sa gahum-gahum, patoo-too (superstition), ug sa dili pagsubay sa hustong balaanon nga pag-gamit niini, sama sa ginabuhta sa mga pipila ka mga ka-igsoonan nato mao kana ang supak sa unang sugo sa Dios. Ang Simbahan wala nagapasagad niana gani sa kanunay nagabadlong sa dili maong pag-gamit.

—
ANG GIYA SA KAMATUORAN
Ni: Bro. John Reyes ug Bro. Ronald Rondina
Catholic Faith Defenders (CFD)
San Antonio de Padua Parish, Agdao , D.C.
Alang sa mga Komento ug Pangutana i-text ug i-email lang kanamo sa 0948-9751417ug john_faith06@yahoo.com, uban ang inyong Pangalan ug Address.