Black Nazarene: intensyon, pamaagi, pagkinahanglan.

Dunay uyon sa pagdebosyon sa Black Nazarene apan supak labi na sa malisud ug peligro nga pamaagi aron lang makagunit o makahalok sa Black Nazarene, gani dunay nangamatay ug daghan ang nasamdan. Unsa ang intensyon, pagkinahanglan, ug pamaagi.

Intensyon. Sa akong pagtuo ang mga miapil sa prusesyon dunay maayong intensyon o katuyoan – ang uban nagpadayag sa ilang mga pasalamat sa mga kaayohan nga ilang nadawat, ang uban dunay dakong pagkinahanglan nga maayo sa ilang sakit o masulbad ang ilang problema o problema sa ilang mahal na kinabuhi. Ang dili maayo nga mo apil kita sa tuyo nga hinakog o kaha sa pagpanghambog sa atong nahimo.

Pamaagi. Dunay supak sa pamaagi, busa susihon nato sa Biblia. Si Naaman nga taga Syria supak sa pag-adto sa suba sa Jordan ug motuslob sa tubig sa makapito. Apan mituman siya sa pagtuslob sa tubig busa naayo siya (2 Kings 5:14) Mabasa pod sa Biblia, nga ang makauna paglukso ngadto saa tubig (linaw) mao ang maayo (Jn. 5:4) Malagmit, dili kita uyon nga maglumba ang mga masakiton aron maayo ang makauna kay niini mabintahan ang mga huyang ug kulang sa kusog. Sa panahon ni Kristo dunay mga mananambal apan ang babaye nga may talinugo naayo siya diha nga nakahikap siya sa bisti ni Jesus ug sila nangaayo (Mt. 14:36). Sa atong panahon, daghan ang mga tawo nga dunay pagkinahanglan nanundog pod sa paagi nga nahasulat sa Biblia. Tungod kay dili man nila makita ang Ginoo, mohikap na lang sila sa Black Nazarene sa paglaum nga matubag ang ilang pagkinahanglan. Kung mohikap sila sa estatwa, nan, mas labi pa nga mohikap sa Ginoo.

Pagkinahanglan. Ang mga tawo nga anaa sa kalisdan o dunay dakong pagkinahanglan moapil/manlimbasug bisan sa malisud/makuyaw nga pamaagi. Tungod kay daghan ang nanuglon nga naayo sila pinaagi sa paghikap sa Black Nazarene. Ang ila bang pagtuo, sa kaugalingon o gasa sa Ginoo? Ang mga bata nga dili pa makasulti, ang ilang pamaagi mao lang ang paghilak ug pagsinggit aron ilang pagkinahanglan maatiman sa ilang ginikanan.

Ang simbahan nagapadayon padulong sa Iyang kahingpitan, busa ang Dios nagapadayon paggamit og mga instrumento ug pamaagi nga dili kalibutanon aron pag-amoma sa katawhan. Ang panagway panahon sa piyesta sa Black Nazarene mausab kung ang mga tawo wala nay mga sakit, wala nay kalisdanan ug pag antos tungod sa ilang kakabus, ug mohamtong na sa ilang kahibalo, kaalam ug pagtuo.

Alang kanako lang, dili pod angay nga atong did-an ang buot manundog s mga nangaayo, gawas na lang kung kita makahimo pag-ayo sa ilang sakit o kaha makahatag kita og trabaho nga ilang gikinahanglan.