Hilum!

Ikaupat nga Domingo sa Ordinaryong Panahon
Dt. 18:15-20/ 1 Cor. 7:32-35/ Mk. 1:21-28

Sa wala pa mobalik sa Manila si Santo Papa Francisco gikan sa Tacloban niadtong Enero 17, siya mihangyo sa mga tawo: paghilum kamo ug pag-ampo alang kanako. Daghan ang natingala nganung kahilom ug pag-ampo ang iyang gihangyo sa wala pa siya mibiya kanila.

Kahilum usab ang gisulti ni Hesus atubangan sa tawong giyawaan. Human nianang kahilum ang yawa migula sa tawo. Nahibulong pag-ayo ang tanan sa nahitabo.

Unsa gayod diay ang anaa sa kahilum? Kini maoy gipasalig sa unang pagbasa. Diha sa kahilum anaa ang katakus sa pagpaminaw sa mensahe sa propeta nga gisaad. Diha sa kahilum maangkon ang pagpaminaw sa pulong nga gilitok sa Ginoo pinaagi sa propeta. Diha sa kahilum madungog ang gisugo sa Dios. Diha sa kahilum makapamati ang tawo ug ang mamati ug makadungog mabuhi ug dili mamatay.

Sa Salmo ang atong tubag mao: Kung karon makadungog kamo sa Iyang tingog, ayaw patig-aha ang inyong mga kasing-kasing. Kung walay kahilum, dili nato madunggan ang tingog sa Dios. Kung dili kita makadungog sa tingog sa Dios, mamahimong tig-a ang atong kasing-kasing tungod kay kini mapuno sa mga kalibutanon nga kahingawa ug kabalaka.

Ang paglaum nga dala sa kahilum mao ang pagkaamgo nga mahimo kitang gawasnon sa tanang kahingawa ug kabalaka. Ang atong kasing-kasing makabati unta sa seguridad diha sa Dios nga atong gimahal ug nagmahal kanato. Ang atong kahilum magdala kanato sa pag-atiman sa unsay makapahimuot sa Dios ug dili niining kalibutana.

Karong Dominggoha, giawhag kita sa kanunay nga paggahin og kahilum taliwala niining gubot ug saba nga kalibutan. Mangita unta kita og higayon matag-adlaw sa pagpamalandong taliwala sa atong daghang mga gimbuhaton. Maningkamut unta kita sa pagtak-um sa atong mga baba ug pag-abli sa dalunggan sa atong kasing-kasing aron atong madungog ang kanunay nga giya sa Dios. Diha lamang sa kahilum atong masinati ang kaayo sa Dios sa matag-adlaw natong pagpuyo.