Sa mga kasinatian nga yano, anaa ang gingharian sa Ginoo

Ikatulong Domingo sa Ordinayong Panahon
Jon. 3:1-5, 10/ Ps. 25:4-9/ 1 Cor. 7:29-31/ Mk. 1:14-20

Daghang nalipay sa pag-anhi sa Santo Papa sa miaging semana. Gani, sa iyang lakaw, iyang gipalabi ang pagduol sa mga kabus nga biktima sa bagyong Yolanda, mga kabataan, pamilya ug mga yano natong kaigsuonan. Kini panalagsa lamang mahitabo sa atong kinabuhi. Wala naglangan ang Santo Papa sa pagpabati sa kaluoy ug puangod sa Dios ngadto sa Iyang yano nga katawhan.

Ang atong mga pagbasa nagpahimangno kanato nga, una, diha sa yano nga mga kasinatian anaa ang tawag sa Dios. Diha mismo sa laypyan sa dagat nadungog sa unang mga tinun-an ang Iyang tawag. Si Kristo ilang nasinati diha sa adlaw-adlaw nila nga gimbuhaton. Diha usab sa atong mga uma, palengke, kadalanan, plaza, opisina ug uban pa, atong masinati ang tawag sa Dios sa pagkamatinud-anon. Sa yano ug simple natong mga gibuhat, Siya nagtawag kanato nga ipakita ang atong pagtuo.

Ang ikaduhang pahimangno mao nga karon na mismo nato masinati ang Dios. Dili na kita maghulat pa ug laing panahon o milagro aron kita mobalik kaniya. Kini mao ang gisangyaw ni Jonas didto sa Nineveh ug sila naghinulsol sa ilang mga sala pinaagi sa pagpuasa. Hinanali usab kini nga panawagan ni San Pablo ngadto sa mga taga-Corinto. Tungod kay mubo na ang panahon, kinahanglang magpuyo kita nga matinud-anon. Sa atong pagmata sa buntag o udto o hapon o gabii o kaadlawon, ang Dios atong mahimamat. Matag minuto o segundo, posible nga ang Dios makigsulti kanato.

Ug ikatulo, ang gitawag ni Kristo mao ang mga yano ug simpleng tawo. Gani pipila kanila gilantaw nga mga sinalikway sa katilingban tungod sa ilang mga sala. Sa ilang kayano, sila walay impluwensiya isip mga mananagat lamang. Apan sila gipili sa Dios aron mosangyang sa ebanghelyo. Sa atong pamati nga kita ubos lamang ug makasasala, kita usab gitawag sa Dios. Siya nag-awhag kanato nga mamahimong kabahin sa pagpakaylap sa Iyang gingharian.

Dinhi kanato karon, ang paghari sa Dios atong puy-an. Kung dili kita, kinsa pa man? Kung dili dinhi asa pa man? Kung dili karon, kanus-a pa man?