“Hands-on”

5th Sunday in Ordinary Time
First Reading: Job 7: 1-4, 6-7
Second Reading: 1 Corinthians 9:16-19, 22-23
Gospel: Mark 1:29-39

“Hands-free” ba o “hands-on” ba ang paggamit sa imong modernong “gadget” sama sa cellphone? Apan adunay “hands-up” (surrender) na lang kay naglisud na sila unsaon paggamit nianang mga modernong “gadgets.” Mao nga “hands-off” na lang sila hangtud adunay motudlo kanila.

“Hands-up,” mao kini ang kasinatian ni Job nga hapit na mawad-an og paglaum sa kinabuhi. Sunod-sunod nga nawala kaniya ang iya mga minahal sa kinabuhi (pamilya), lakip na ang iyang mga katigayonan. Gitakbuyan pa gayud siya og sakit. Mao nga mireklamo siya sa Ginoo kung ngano mura’g “hands-off” ang Ginoo sa paghatag kaniya og hinabang. Ingon ani usab ang kasinatian niadtong gisulay sa kinabuhi. Apan miabot si Job sa punto nga, sa kamapaubsanon, gitugyan niya sa gahum sa Dios ang tanan. Naka-amgo si Job sa katapusan nga kinsa kadtong mosalig sa gahum sa Dios makasinati sa kahulugan sa kinabuhi ug walay problema nga dili masolusyonan. Kay sa kanunay ang Ginoo “hands-on.”

Si Pablo, diha sa ikaduhang pagbasa, “hands-on” sa iyang misyon sa pagsangyaw sa maayong balita sa Dios. Giisip niya kini nga obligasyon, mao nga determinado siya sa pagsangyaw sa ebanghelyo aron mahiduol ang mga tao sa Ginoo. Iya usab gidasig ang mga taga-Corinto sa pagbuhat sa ingon. Ilabi na ang mga bag-ong nakabig sa pagtoo.

Si Hesus, diha sa ebanghelyo, “hands-on” sa iyang ministriya ilabi na ang pag-ayo sa mga masakiton. Niining higayona, iyang giayo ang ug angang babaye ni Simon nga gihilantan. Ang panghitabo nagsugod sa panahon nga giingnan si Hesus sa iyang mga tinun-an mahitungod sa masakiton. Sa maong paagi, nahimo sila nga instrumento sa kaayuhan. Ang tinuod nga pagkatinun-an ni Hesus mao ang maakuhong paghatag sa kaugalingon alang sa pag-alagad sa mga nanginahanglan ilabi na ang mga masakiton ug mga kabus natong mga kaigsoonan.

Niining tuig alang sa mga kabus, ang tawag sa pagpangalagad dili “hands-free” kondili “hands-on.” “Hands-up” kung dili makaya sa atong tawhanong kahibalo ug kusog. Itugyan (hand-over) ang tanan sa Dios kinsa sa kanunay “hands-on” sa kanunay sa pagpangalagad sa mga kabus.