Job, Ugangan, Filipinas masakiton

Niadtong ika-duhang Domingo sa Febrero, sa unang binasa (Job. 7) si Job nag-antos sa iyang sakit ug nagahunahuna nga ang pag-antos mao gayod ang mahiaguman sa tawo dinhi sa kalibutan. Busa siya nakasinati sa daghang kalisdanan, apan nagpabilin ang paglaum ug ang kahimtang sa iyang kinabuhi, iyang gitugyan ngadto sa Dios nga labing gamhanan.

Sa ebanghelyo (Mk. 1: 29-39) mabasa nga ang ugangan ni San Pedro nagmasakiton ug naglubog sa banig, dili makabangon. Hinonoa , ang Ginoo misulod sa ilang balay, migunit sa kamot sa masakiton ug nakabangon aron pagsilbi kanila. Daghan apan dili tanan giayo sa Ginoo apan miadto siya sa ubang mga balangay kay Siya misulod sa kalibutan dili lang sa pag-ayo sa mga sakit kundili aron pagwali sa Ebanghelyo nga mao ang makaayo sa atong nasud ug makawagtang sa mga kagubot nga maoy hinungdan sa kalisdanan, kasakit ug pag-antos sa katawhan. Ang Ginoo mao ang nag-ayo kang Job; sa ugangan ni San Pedro, ug Siya ang maka pawagtang sa mga nagkalainlaing mga sakit sa atong nasud.

Ang responsorial Psalm (Ps. 147) “Praise the Lord, who heals the broken-hearted.”

Si Kristo mao ang makaayo sa mga sakit sa tawo ug mga kagubot sa kanasuran pinaagi sa ebanghelyo sa kalinaw ug pagpakigdait. Busa sa ikaduhang binasa si San Pablo miingon “Alaot ako kung wala pa ako magwali sa ebanghelyo.” (1 Cor. 9:16)

Gitudlo sa atong Simbahan nga ang misyon ni Kristo, misyon usab sa matag sakop sa Iyang lawas. Sa mga kagubot sa atong nasud adunay kasulbaran ug ang tawo mao ang instrumento sa Ginoo aron pagsangyaw sa ebanghelyo sa kalinaw ug pakigdait. Apan bisan sa mga katoliko adunay panagsumpaki ug kagubot. Ang uban nagsangyaw sa kagubot pinaagi sa paggamit sa freedom of expression/press nga walay pagrespito sa mga butang nga sagrado o balaan alang sa ubang tinuohan. Ang atong nasud mas nagkinahanglan sa kalinaw ug panagdait kay sa freedom of the press. Sa ubang nasud, mas bililhon kanila ang freedom of the press kay sa kalinaw, busa misamot ang mga kagubot. Ang uban kanato nagsangyaw sa pagpanimalos nga mas daghan pa ang mamatay, mawad-an og bana, mawad-an og amahan.

Ang uban walay tingog kay tingali walay nahibaloan. Apan kung alaot ang mga wala magwangyaw sa kalinaw, nan, mas labi pa nga alaot kadtong naghaling sa kasuko sa katawhan aron mosamot ang kagubot sa atong nasud. Dunay nag-ingon nga kung kita walay maayong isulti, nan, mas maayo pa nga maghilum.