Mercy and Compassion

6th Sunday in Ordinary Time: Feb. 15, 2015

1. Sa pag-abot ni Pope Francis dinhi sa Pilipinas, ang tanang tawo gusto gyud nga makaduol niya, gawas sa gusto magpa ‘SELFIE SELFIE’ labaw sa tanan gusto makaduol niya, gusto mohikap niya, mokagos niya, gusto magpa bendisyon o bisan lang maka duol-duol lang ug gamay. Ug dili lang kay kita gusto makaduol niya, nakita nato nga ang Santo Papa gusto pud makaduol sa mga tawo labi na ang mga pobre kaayo, mga masakiton ug mga biktima sa nagka-lainlaing trahedya sa kinabuhi. Tanan gusto maka hikap kang POPE FRANCIS.
2. Usa ka tawo nga masakiton, sanglahon nagluhod ug nagpakilooy sa atong Ginoo karong Dominggoha diha sa atong Santos nga Ebanghelyo. “Ginoo, kung buot nimo, mamaayo ako.” Ug tungod sa kalooy sa Ginoo, diha diha dayon giayo niya ang tawo nga masakiton, ang tawo nga sanglahon. Wala mahadlok si Hesus nga matakdan sa sanglahon nga tawo nga sinalikway sa katilingban kay gikahadlokan ang sakit nga sangla sa panahon ni Hesus. Gani sa atubangan sa daghang mga tawo gihikap ni Hesus ang tawo nga sanglahon ug giayo niya. Si Hesus wala mahadlok matakdan sa sakit nga sangla, ang tawo nga sanglahon maoy natakdan sa pagkamaloloy-on ni Hesus. Natakdan siya sa pagkamaloloy-on ni Hesus ug gani iya kining gipamalita sa kadaghanan.
3. Pagka-nindot nga hulagway. Si Hesus wala mahadlok mohikap sa tawo nga sanglahon, wala mahadlok matakdan, ang tawo hinoon nga sanglahon, maoy natakdan sa pagkamaloloy-on sa atong Ginoo.
4. Pila kahay natakdan sa ‘MERCY AND COMPASSION’ nga maoy tema sa pag anhi sa atong Santo Papa. Or naa ba kahay natakdan sa iyang gipakita nga ‘MERCY AND COMPASSION’ kanato. Dakong sayang kung kita dili kamao malooy sa mga pobre kaayo, sa mga tawo nga nagpakilooy nato, sa mga tawo nanginahanglan sa atong tabang. Dakong sayang kung ang atong kaloy-an kato lang mga tawo nga ganahan ta, mga tawo nga gipangpili nato ug mga tawo nga mga suod nato.
5. Ang tawo nga masakiton, ang tawo nga sanglahon maoy natakdan sa pagka-maloloy-on ni Hesus. Kitang tanan karong Dominggoha, pwede kaayo maka pangutana sa atong kaugalingon, unsa kahay nakapatakud nako sa uban?
6. Natakdan ba kaha ang mga tawo sa akong palibot sa akong kangil-ad ug batasan, kahakog, kahugaw ug hunahuna, kalaw-ay ug sinultihan?
7. O natakdan ba kaha sila sa akong kabuotan, sa akong pagka-mangihatagon o sa akong pagkamaloloy-on?