Pagtintal

Unang Domingo sa Kwaresma
Gen. 9:8-15/ Ps. 25:4-9/ 1 Pet. 3:18-22/ Mk. 1:12-15

Mubo kaayo ang pagbasa sa Ebanghelyo sa bersiyon sa pagtintal ni Hesus niining tuiga sa unang Domingo sa Kwaresma. Apan naghatod kini kanato sa riyalidad sa pagtintal nga nagpalibot kanato.

Una, diha sa kamingawan mahitabo ang mga pagtintal. Ang literal nga hubad sa iningles nga bersiyon mao ang disyerto. Kamingawan man o disyerto naghulagway sa kalisud ug kapait. Diha sa maga kalisud ug kapait nga kasinatian anaa ang pagtintal ni Satanas. Pila kaha kanato ang natintal sa pagbuhat og dili maayo tungod kay mingaw ang palibot? Pila kaha kanato ang natintal sa pagbuhat og sayop tungod kay lisud kaayo ang atong kahimtang?

Ikaduha, sa pagtintal anaa ang mga ihalas nga mananap. Sa mga ihalas nga mananap kitang tawo walay gahum kung ang atong kaugalingon lamang. Mapildi gayod ang tawo kung siya walay hitsas nga magbatok kanila. Kining mga ihalas nga mananap karon mao ang daghang gamit o lugar o kalihukan nga makapildi gayod kanato. Pila kaha sa atong mga kabataan ang moapil sa Kasaulogan o motahod dayon sa sugo sa mga ginikanan kaysa pagdula og computer? Pila kaha sa mga gumagamit sa internet karon ang moampo og tagsa ka oras kaysa molingkod hangtod tungang gabii “on line“?

Ikatulo, kung mosangpit unta kita sa anghel nga kanunay nagbantay kanato, sama kang Hesus kita lig-on nga mobatok sa mga pagtintal. Dinasig sa Espiritu, kita makasugakod nga mobarug sa sakto kung ang anghel atong tugotan nga manalipod kanato. Pila kaha kanato ang mosalig sa atong anghel bisan sa kalisud kaysa modawat lang dayon og suhol bisan sayop ang gihimo? Pila kaha kanato ang makapaabot nga atimanon kita sa Dios kaysa mobuhat lamang og sayon bisan nakatamak kita sa katungod sa uban?

Kini kabahin sa atong pamalandongan sa atong pagsugod sa Kwaresma. Taliwala sa pagtintal, lig-on unta kitang mobarug alang sa atong kaluwasan.