Ang kasulogan sa Kwaresma

Ang Kwaresma o Lent usa ka importanteng kasaulogan sa Simbahang Katoliko maingon man usab sa tibook Kristiyanos sa kalibutan. Kabahin kini sa liturhikanhong siklo sa atong Simbahan nga adunay dakong importansya nga kalihokang espiritohanon.

Ang dakong tumong niini mao ang atong pagpangandam sa pagsaulog sa misteryo paskwal sa atong Ginoo pinaagi sa paghandom ug pagsaulog sa kasakit, kamatayon ug pagka-banhaw ni Jesukristo. Kita magbuhat ug espiritohanong mga lihok sama sa PAG-PUASA dili lang sa pagkaon kondili sa pagpugong usab sa mga unodnon ug materyal nga mga buhat, PAG-AMPO sa kanunay uban sa pagpamalandong sa atong mga kasal-anan nga nabuhat batok sa Dios ug sa isigkatawo uban sa paghinolsol ug pagkumpisal niini ug ang PAGKA-MANGGIHATAGON sa tanan ilabi na sa mga kabus tang kaigsoonan ug pagbuhat sa kalooy ngadto sa isigkatawo sama sa pagduaw sa mga masakiton, mga binilanggo, paghatag ug tambag sa mga tawo nga masulob-on, pagtudlo sa wala masayod ug uban pang Diosnon nga mga buhat.

Dili dautan kung atong handomon ang kamatayon ni Ginoong Jesukristo kay tungod sa iyang kamatayon nahatagan kita ug kaluwasan. Gani ang paagi sa atong paghandom niini mao ang pagbalik lantaw sa atong kinabuhi kung kita nahisubay ba sa iyang kabobot-on uban ang paghinolsol ug pagpasaylo maingon man usab ang paghatag ug lalom nga pagtagad sa mga buhat ug lihok ni Ginoong Jesukristo dinhi sa kalibutan.