Ang Latus nga Nilubid

Ikatulong Domingo sa Kwaresma
Exodus 20: 1-17/1 Corinthians 1: 22-25/John 2: 13-25

Aron mahaom ang atong kinabuhi ngadto sa atong Ginoong Hesus ug aron madawat nato ang kinabuhing dayon atong tumanon ang mga kasugoan ug musunod kita Kaniya.

Ang atong ebanghelyo naghisgot mahitungod sa paglimpiyo sa Templo. Mitungas si Hesus ngadto sa Jerusalem atol sa Pangilin sa Pagsaylo- ang usa ka dakong pangilin sa mga Judio. Giabog ni Hesus ang tanan pagawas sa Templo ginamit ang latus na nilubid kay gihimo sa mga tawo ang balay sa Iyang Amahan og balay-baligyaanan. Gipahinumduman ni Hesus ang mga tawo sa tinuod nga kahulugan ug katuyuan sa Simbahan—a place of worship in Spirit and in Truth.

Ang mga tinun-an nahinumdum nga mao kini ang katumanan sa giingon sa Kasulatan- The Messiah would purify the temple. Ang Simbahan kinahanglan ug radical nga paglimpiyo.

Ug mao kini ang kahulugan sa Kwaresma. Ang atong kinabuhi angay usab nga pagalinisan sa mga sala, hilabina ang atong kakulang sa pagpaubos ug ang pagpangalagad nga may tim-os nga gugma.

Ug mao kini ang diwa sa Dekalogo o ang napulo ka sugo diha sa unang pagbasa. Kini naglangkob sa Balaod nga gihatag sa Dios ngadto sa katawhan sa Israel sulod sa konteksto sa Kasabutan nga gipataliwad-an ni Moises. Pinaagi niini gitultulan ang piniling katawhan ug ang matag usa kanato sa agianan padulong sa kinabuhing dayon- ang kinabuhing nakalingkawas sa kaulipnan sa sala. Kini mao ang kasugoan sa gugma sa Dios ug sa isigkatawo.

Ang pagtuman sa balaod kinahanglan dinasig sa gugma sa Dios ug sa atong isgkatawo. Ug ang atong pagsimba dili sama sa mga pari ug sa mga namaligya sa templo nga gihimo nila ang relihiyon ug usa ka business venture.

Ang atong salmo nagpahinimdum kanato nga ang mga balaod sa Dios hingpit ug nagahupay sa kalag. Matarong ang mga balaod sa Dios ug nagalipay sa kasingkasing.

Ang latus na nilubid nagpasabot sa lamdag sa kasabotan diin ang Dios nagpadayag sa iyang kaugalingon ug nagpaila sa iyang kabubot-on. Ug ang pagtuman sa mga balaod sa Dios nagpadayag sa atong pagkaiyaha sa Dios ug nagatubag sa iyang pasiugda sa gugma. (Rev. Fr. Zalady D. Abonales)