Diha sa kamatayon kita mamunga

Ikalima nga Domingo sa Kwaresma
Jer. 31:31-34/ Ps. 51:3-4, 12-15/ Heb. 5:7-9/ Jn. 12:20-33

Dunay usa ka tawo nga hilabihan niyang pagmahal sa sapatos nga gihatag kaniya sa iyang suod nga higala. Tungod sa hilabihan niyang pagmahal niini, wala niya kini gamita kay basin kuno madaut. Buot niya nga dili kini madaut kay mahal kaayo kini niya. Mao nga wala niya kini gamita hangtod nga kini nadunot ra gihapon.

Ingun niini ang kinabuhi nga gipuy-an ni Kristo. Sayod siya sa tumong nganu nga ania siya niining kalibutana. Gihatag siya sa Amahan aron mag-antus alang kanato. Bisan siya daw nadunot atubangan sa kadaghanan, iyang nahimo ang tiunay nga tuyo sa iyang pag-anhi kanato. Bisan siya namatay, nabuhi siya aron ang tanan nga mituo kaniya mahatagan sa kaluwasan.

Ingun niini usab ang atong pagkinabuhi isip Kristiyano. Kita gasa ngadto sa uban. Kinahanglan ihalad nato ang atong kaugalingon bisan mag-antus isip ginikanan alang sa atong mga anak. Kinahanglan unahon ang sakripisyo sa pagtuon ug paglikay sa bisyo aron makalampus isip estudyante. Kinahanglan mokayod isip trabahante aron makatabang sa pamilya. Kinahanglan mo-ugmad kita sa uma adlaw-adlaw aron makapaabot sa ting-ani. Bisan si Kristo anak sa Dios, siya nagpaubos ug nagmasinugtanon sama sa gisulti sa ikaduhang pagbasa.

Daghang mga higayon sa atong kinabuhi nga daw kita mamatay tungod kay dili nato mahimo ang atong gusto. Apan kanang maong sakrispisyo kung gihimo nato alang sa kaayohan sa uban, dayag nga kita nagpatuman sa balaod sa Dios nga nadungog nato sa unang pagbasa. Kita mapasaylo sa Dios kung kita maantigo nga mobati sa panginahanglan sa uban. Diha lamang sa paghikalimot sa atong kaugalingon sama kang Kristo, kita mamahimong insrumento aron kita makaalagad sa isigkaingun. Nianang maong kasinatian sa kamatayon nga dili kinahanglan kanunay pisikal, kita makabunga.