Nganong Mag-Usab-Usab Man ang Petsa sa Pagsaulog sa Kwaresma?

Nganong mag-usab-usab man ang petsa sa pagsaulog nato sa kwaresma o paghandom sa kamatayon ni Ginoong Jesukristo? Angay natong hinomdoman nga ang kwenta sa Simbahan bahin sa paghatag ug petsa niini wala magbasi sa atong kalendaryo nga ginagamit nato karon nga ginatawag ug GREGORIAN CALENDAR, kondili gipahaom lamang sa presenting ginagamit nato karon.

Ang Ginoong Jesukristo natawo ug namatay sa panahon diin ang gigamit niadtong higayona mao ang JEWISH CALENDAR nga adunay dakong kalahian gayud sa atong kalendaryo karon. Ang atong Ginoong Jesukristo namatay sa bulan sa NISAN (Jewish Calendar), 15 ang petsa niini, diin takdol ang bulan niini. Mahinomdoman nga si Jesukristo nagsaulog sa Pista sa Pagsaylo (Passover), sa wala pa siya ilansang sa Krus. Ang mga Tinun-an ni Jesukristo miingon: “Asa ba nimo ipaandam kanamo ang panihapon sa pasko? Niadtong gabhiona, bisperas kadto sa iyang kamatayon, diin misaulog si Jesukristo sa iyang katapusang panihapon” (cf. Mat. 26:17-26, Juan 18:28).

Kining pista sa pagsaylo o Passover ginasaulog sa mga Hudiyo sa matag petsa 14 sa bulan sa NISAN. Kini mao ang nahiuna nilang bulan (cf. Lev. 23:5, Exo. 12:6, 14-18). Gisaulog kini nila atol gayud sa takdul ang bulan (cf. Salmo 81:2-5, Exo.12:7). Pagka-ugma human sa Pista sa Pagsaylo mao ang pagpatay kang Ginoong Jesukristo, ug kini nahitabo sa petsa 15 sa bulan sa NISAN. Ang bulan nga Nisan sa mga hudiyo gitugbangan sa atong Kalendaryo karon sa duha ka bulan tung-tunga sa MARSO 15-30 ug tung-tunga usab sa petsa 1-15 sa bulan sa Abril.

Busa sa ato pa 30 ka adlaw gihapon mao ng dili gayud pirmi sa usa ka petsa lamang ang atong pagsaulog paghandom sa kamatayon ug pagka-banahaw ni Ginoong Jesukristo, kay ipatukma man gayud kini sa Dominggo nga human sa takdul ug ika-kwarenta ka adlaw (40 days), gikan sa Miyerkules sa Badlis. Ang Sinugdanan sa Kwaresma mao ang Miyerkules sa badlis nga taliwala sa Pebrero 4 ug Marso 11 ug tali niining petsaha pangitaon ang Miyerkules nga ang iyang ika-kwarenta o 40 days mao ang ika-unom nga Dominggo nga labing duol gayud sa takdul ang bulan. Kining Dominggoha mao ang Pasko sa Pagka-banhaw nga anha usab kini sauloga taliwala sa Marso 22 ug Abril 25 tapos sa Vernal Equinox. Ang Equinox mao kini ang panahon nga ang adlaw ug gabii pareho ang oras. Kini mahitabo sa Marso 21 tungod sa maong rason nga ang Dominggo sa pagkabanhaw ipatukma gayud sunod sa takdul ang bulan. Busa dili gayud pirmi sa usa ka petsa ang pagsaulog nato sa kwaresma o lent.