Ang balik-balik nga ampo kon repetitious prayer

Good day sa inyo mga brothers! Salamat sa inyong nindot nga artikulo bahin sa pagpasabot sa pagtulun-an. Ask lang ko nganong kitang mga Katoliko kon mag-ampo balik-balik man ang pulong. Dili ba kini dautan? ~Angel Marie of Agdao, Davao City

Ang pag-ampo mao ang mahigugmaong pakighinabi nato ngadto sa Dios diin atong gibayaw ang atong huna-huna ug kasing-kasing ngadto kaniya. Ug isip usa ka Kristiyanos nga nag-ila ug nagtuo sa Dios, atong responsibilidad ang paghatag ug pagdayeg ug pagsimba, pagpasalamat, pagpangayo ug kapasayloan sa mga kalapasan ug pagpangayo ug grasya ngadto kaniya pinaagi sa mga pag-ampo. (cf. Mateo 6:9-10, Mateo 26:41, 1 Timoteo 5:17 ug Mateo 7:7)

Sa dihang kita mag-ampo usa kana siya ka maayong hiyas sa pagtubag sa responsibilidad nga gisangon sa Dios dinhi kanato nga angay gayud nga kita mo-ampo kaniya ug usa kini ka buhat sa pagpakita sa gugma nato sa Dios nga atong giila ug gialagaran.

Dili dautan ang pagbalik-balik nato sa mga pulong sa pag-ampo kay walay sayop sa usa ka kinasing-kasing nga pag-ampo bisan pa ug kini imong ginabalik-balik paglitok. Pananglitan nga kon ikaw moingon sa imong hinigugma ug I LOVE YOU adlaw ug gabii ngadto kaniya siguro dili niya kini ikasuko gani mas ikalipay pa ni niya, kay kini pagpakita lamang sa imong gugma ngadto kaniya pinaagi sa paglitok sa maong pulong nga ikaw nahigugma gayud, sama usab sa pag-ampo nato sa Dios bisan pa ug atong balik-balikon ang maong pulong sa pagsimba ug pagdayeg kaniya mas iya kining kahimut-an. Kay walay tawong naga-ampo nga dautan batok sa Dios ang tanan gayud nga atong gilitok sa matag pag-ampo alang sa pagdayeg ug paghigugma kaniya. Dili tanang pagbalik-balik dautan sama pananglitan sa adlaw-adlaw natong ginalihok sa atong kinabuhi ato kining ginabalik-balik (pagkaligo, pagkaon, pagpanglimpyo ug uban pa.), busa ang pagbalik-balik nga makaayo mas makahatag pa kanimo ug maayong resulta, maingon usab sa atong mga pag-ampo bisan pa ug ato kining ginabalik-balik ug paglitok mas makahatag pa hinoon ug lalom nga gugma nato ngadto sa Dios nga atong gina-ampoan.