Cleansing of the temple

Gilimpiyohan sa Ginoo ang templo sa Dios. Kita usab templo sa Dios busa kita usab kinahanglan nga limpyo. Gitukod ni Kristo and sakramento sa pagkumpisal aron pinaagi sa paghinulsol ug pagsugid sa atong mga sala ngadto sa pari malimpyo kita kay dunay kapasayloan sa atong mga sala.

Ang tawo dunay kinaiya sa kahakog ug kining kahakog ponuan nga mo-resulta ngadto sa mga sala sama sa pagpangawat, pagpatay, pagpangurakot sa salapi sa gobyerno. Ang pagpangawat ug pagpatay ikumpisal, apan malagmit, makasala lang gihapon tungod kay ang mga punoan sa sala nagpabilin. Kasagaran dunay pagkumpisal apan kulang and paghinulsol; ug gani, walay kasayuran mahitungod sa mga ponuan sa 7 ka ponuan sa mga sala, busa walay paghinulsol.

Busa kinahanglan nasayod kita sa mga ponuann sa sala kay kini mga sakit sa atong kalag. Kung kita dili buta ug nasayud sa mga punoan, nan, kinahanglan nga kita dunay tinguha nga mawala o mamaayo. Kining nga sakit sa atong kalag. Ug ang tinguha kinahanglan ubanan sa paghinulsol ug ang paghinulsol ipakita sa buhat nga kinahanglan o angay nga buhaton. Kita nga mga tawo, mga templo nga masakiton. Busa, sa atong pagkalawat naga-ampo kita sa pag-ingon, “Ginoo dili ako angay nga mokalawat Kanimo, apan ipamulong Mo lamang ug mamaayo ako.” Hangtod karon, kita, ang Simbahan nga lawas ni Kristo masakiton lang gihapon kay dili pa hingpit nga limpyo ang atong lawas ug kalag nga templo sa Ginoo bisan pa kanunay mosulod ang Ginoo diha sa atong pagkalawat. Busa ang pito ka punoan sa sala – garbo, kahakog, kasina, kasuko, kaulag, katapul, ug kaulit magpabilin kung wala kitay tinguha nga kini mawala.

Kung kita dunay tinguha nga mapatay ang bisan unsang ponuan sa sala, nan, kinahangalan ipakita nato pinaagi sa mga buhat nga angay o kinahanglan buhaton. Kung kita dunay kinaiya sa kahakog, nan, kita dili lang diha lang diha kutob sa mga pag-ampo, kinahanglan nga kita mohatag ngadto sa uban kanunay ug dinagko sumala sa atong katakos, dili sama sa atong naandan nga panagsa ug ginagmay lang ang ihatag. Kini ang usa sa mga paagi sa pagpatay sa punoan sa kahakog aron nga sa matag adlaw makuhaan ang hugaw o sakit sa atong templo nga bout limpyohan sa Ginoo. Sa biblia mabasa, “Busa patya ninyo ang mga kaibog nga kalibutanon…kaulag…kahakog…“ (Col. 3:5) Si Kristo misulod sa atong lawas o templo, kinahanglan Siya mag-uswag, samtang kita mag-us-os (Jn. 3:30), pinaagi sa atong paghinulsol alang sa mga punoan sa sala.