3 in 1

KARONG Domingoha ang Simbahan sa tibuok kalibutan nagsaulog sa dakong kapistahan nga naghandom sa dakong misteryo sa atong pagtuo—ang kapistahan sa Santisima Trinidad.

Usa kini ka balaan nga kasaulogan diin ang Diyos mismo maoy atong gihandom, ang tinubdan sa tanan. Apan dili sayon ang pagsabut niining maong misteryo.

Ang pagka-Diyos dili gayud matugkad ni bisan kinsa. Siya nagpadayag nga usa lamang sa pagka-Dios apan nagkalahi-lahi sila nga Persona. Dili nato malalis nga dunay mga pundok nga wala modawat sa pagka-Diyos ni Kristo.

Gani, dili usab nila madawat ang Diosnong kinaiya sa Espiritu Santo. Alang kanila, ang Santisima Trinidad layo ra sa tawhanong panabot. Busa wala kini nila dawata. Ilang nakalimtan ang kamatuoran nga ang Diyos nga naglalang sa tawo dili mamahimong ulipon sa tawhanong kaalam.

Ilang gisulay paglibog ang termino nga Trinidad nga “tri-thiesm” o tulo ka dios. Gani, ila pang gipasangil nga ang mga Katoliko nag-ila nga tulo ang Dios.

Mao kini ang opisyal nga tudlo sa Simbahan: “Now this is the Catholic Faith: We worship in ONE GOD in TRINITY…for the Person of the Father is One, the Son’s another, the Holy Spirit’s another but the GODHEAD of the Father, Son and Holy Spirit is ONE, their GLORY EQUAL, their MAJESTY CO-ETERNAL” (Catechism of the Catholic Church CCC p. 80 par. 266).

Klaro nga ang Simbahan wala nagtudlo nga tulo ang Dios, kondili nagtoo og usa lamang ka Diyos diha sa tulo ka Persona ang Amahan, Anak ug Espiritu Santo (Mat. 28:19-20). Tulo ka Persona apan usa lang ang ilang substance o kinaiya sa pagka-Dios.

Unsa ang kahulogan sa pulong nga persona ug pulong nga kinaiya? Ang PERSONA usa sa pagkamao nga adunay kaugalingong salabutan, ug gawasnong kabubut-on, ug ang KINAIYA mao ang kaugalingong lintunganay’ng hiyas nga nakapamao sa butang nga ginganlan.

Ang Amahan ato gayud masabot nga duna siya’y salabutan ug kabubut-on nga lahi sa Anak ug Espiritu Santo (Juan 3:16, 20:17), maingon man usab ang sa Anak nga si Jesukristo duna usab siyay salabutan ug kabubut-on nga lahi sa Amahan ug Espiritu Santo (Mat. 28:19-20, Juan 14:6, 28). Ingon usab ang Espiritu Santo nga aduna’y salabutan ug kabubut-on nga lahi sa Amahan ug Anak (Buhat 13:2, Efeso 4:30, Juan 14:26, 15:26). Apan walay bangi kondili dunay pagkahiusa diha kanila.

Ang Diyos mismo maoy nagpadayag sa ilang pagkahiusa diha sa pagkaDiyos nga managlahi usab ang ilang Persona (Mat. 3:16-17 ug Genesis 1:26). Ang matag tulo ka Persona nagkahiusa diha sa maong Kinaiya sa pagka-Diyos, sama pananglitan sa usa ka papel nga gipilo katulo.

Matag pilo matawag ug papel apan dili sila tulo ka papel kondili usa ka papel sa tulo ka pilo.

Busa ang Santisima Trinidad o USA KA DIOS diha sa TULO KA PERSONA usa ka pagtulun-an diin ang Diyos mismo maoy nagpadayag kanato ug angay tuhuan ug puy-an sa kanunay. (John Reyes | Ronald Rondina | ANG GIYA SA KAMATUORAN)