Kinabuhi ni Don Bosco, apil sa Bible Quiz

Atol sa ika-8 niining kapiyestahan, nagpa ‘Bible Quiz’ ang parokya sa Mary Help of Christians.

Matud pa sa kura paroko nga si Fr. Marcelino Benabaye, SDB, naghatag na sila ug handout kada bulan sukad niadtong Agosto pinaagi sa mga Pangulo sa Pagpanudlo.

“Aduna man gud mi’y Junior DAYCA; dose anyos paubos. Pero kanang Bible study namo dili lang na limitado sa mga bata kundili apil na sa mga pangulo.” Gahatag sab sila ug dugang nga kopya niadtong bulan sa Enero atol sa bulan ni Don John Bosco aron makakat-onan sila sa kinabuhi sa maong pari.

Adunay unom (6) ka sona nga nagtigi sulod sa upat ka rounds. Ang mga pangutana kalabot sa kinabuhi ni Hesus, Don John Bosco, Santo Papa Francesco, ug sa Artsidiyosesis sa Dabaw. Ang kada sona gilangkuban sa usa ka Pangulo sa Katilingban (PSK), Pangulo sa Liturhiya (PSL), Pangulo sa Alagad (PSA), PSP, Davao Archdiocesan Youth Coordinating Apostolate (DAYCA), ug youth. Ganti nga kwarta ang nadawat sa mga midaug: Zone 6A ug 6B (Consolation), Zone 3B (4th place), Zone 4 (3rd place), Zone 1 (2nd place), Champion Zone 3A.

Matud pa sa mga misaksi niini, nalingaw sila sa padula ug kini usab makalambo sa ilahang Katolikong pagtoo. Gawas sa Bible Quiz, aduna puy gipahigayon nga Folk Dance, Choral Singing, ug Volleyball. (Janin R. Langoy)