GKK Visitation Epektibo sa Pagdani sa Batan-on

GKK Visitation, Obrero

Kini nga pangutana maoy naghagit sa Parish Youth Coordinator og Core Group sa parokya sa Sacred Heart of Jesus Obrero. Ug agi’g tubag sa maong hagit, nagpahigayon ug GKK Visitation sa mga batan-on aron ma-kumusta sila. Sanglit dili kini ang unang higayon nga adunay visitation tungod kay nahitabo na kini sa una ug nakita nga adunay pipila nga positibong tubag ang maong kalihukan. Aron mamugna ang relasyon, importante nga magkatigum sa usa ka lamesa. Tinuod nga ang mga batan-on ganahan mutigom og naay pagkaon apan dili lang pagkaon nga pisikal, alang sa espiritwal nga bahin usab. Mao kini ang gihatagan og importansya sa parish priest Msgr. Cuision, parochial vicar Fr. Ronald Arcillas, og Pastoral Team.

Matud pa sa Parish Youth Coordinator Ms. Justine Kaye Delgado, katuyuan sa maong pagbisita nga ang batan-on magkailhanay labina ang mga batan-on nga mamumuo sa katilingban og mahibaw-an ang partisipasyon sa matag usa. Pagpangandam usab kini sa dakong panagtigum sa mga batan-on karong Oktobre. Gipahigayon ang unang pagbisita sa GKK Our Lady of Guadalupe niadtong Hulyo 20. Adunay 21 ka mga GKKs ang parokya. (Milagros Paspe)

Itom nga Nazareno Nabalhin na sa Tigatto GKK

Ang gihatag nga replika sa Itom nga Nazareno gikan Quaipo, human madala sa San Alfonso Ma. de Liguori sa Mandug niadtong Agosto 15, anaa na karon sa kapilya sa Our Lady of Peñafrancia, Tigatto.

Sa pagbalhin sa iyang permanenteng kabutngan niadtong Agosto 17, gibati sa mga sakop sa parokya ang kabulahan tungod sa iyang presensya. Mao pud ang gibati sa General Manager sa Deca Homes sa Esperanza, Tigatto nga si Mary Ann Chua. Mapasalamaton si Mary Ann sa Gagmay’ng Kristohanong Katilingban (GKK) sa Tigatto sa paghatag ug panahon ug nanghinaut siya nga mas muhugot pa ang pagtoo sa mga tawo sa Ginoo. Uban ang ilang empleyado, usa ka bulan ang pagpangandam alang sa pag-abot sa Nazareno. “In fact, na-delay siya tungod sa bagyo kaniadtong Hunyo. We were expecting the Black Nazarene to be here mga first week of July. Pero tungod lagi sa panahon, nadugay siya and it was here I think three weeks ago.”

Gipadayag niya sa mga mitambong nga sa pagbiyahe gikan Luzon, “…naa siya’y mga ‘guardians’ nga mga tawo aron mubantay, mao nang gisakay kini sa barko gikan Manila pa Cagayan de Oro. Didto gisugat ug gidiretso sa Bishop’s palace dinhi sa Davao. Human, amo dayong gi-plastar ang aktibidad…dili tanang lugar gitagaan ug ingon ani. Nanimbawot ang mga balahibo sa uban maybe because na-feel nila ang presensya sa Ginoo. This is just an illustration or an image of what happened in the past.” Ang imahe mao ang ikaupat nga Itom nga Nazareno sa Davao gawas sa San Pedro Cathedral, Sta. Ana Parish og sa New Lanzona GKK, Matina. (Janin Langoy)