Mga Birtud sa Pagka Kristohanon, Sentro sa Kalihukan sa St. Francis of Assisi

GIKAHINAMAN karon sa mga parokyano sa St. Francis of Assisi Quasi Parish sa La Verna Hills, Davao City ang nagsingabot nga kasaulogan sa ika-3 nga Patronal Fiesta. Han-ay na ang mga kalihukan nga magsugod sa Kumpirma sa Sept. 5 ug Blood Letting sa Sept. 6, 2015.

‘Ang highlight sa atong kapistahan mao ang pasalamat sa tanang mga nisuporta sa katukuran sa simbahan si milabay nga duka ka tuig,’ ingon ni Fr. Orlando Angelia, DCD, kura paroko sa St. Francis of Assisi Quasi Parish sa La Verna Hills Subdivision, Davao City.

Sugdan dayon ang 9-day novena sa Sept. 8 hangtod Sept. 16 una ang kasaulugan sa Pista sa Sept. 17. Adunay tema matag adlaw sa mga inadlaw nga kalihukan nga naghulagway sa mga birtud nga gihuptan ni San Francisco de Asis nga maoy nakapahimo niyang duol sa Diyos.

Buot usab nga i-promote sa parokya ang kulturang Pilipino pinaagi sa paghimo sa ilang motif sa mga kalihukan sa kapistahan nga Pista sa Nayon. Midugang si Fr. Angelia, “Gilambigit usab nato ang kabataan pinaagi sa pagpahigayon ug Larong Pinoy.”

Subay sa tema, “San Francisco De Asis atong Modelo sa pagka piniyalan sa Kinaiyahan,” gipangandaman usab ang Urban Organic Gardening nga i-showcase atol sa kapistahan.

“Si St. Francis maoy patron sa creation ug nature,” si Fr. Angelia nagkanayon. Gawas sa iyang mga maayong birtud nga nakapahiduol sa Diyos, siya usab ang modelo sa kinaiyahan.

“Mao kini atong tubag sa Laudato Si sa Santo Papa,” misumpay si Fr. Angelia, “gikinahanglan nga iduso nato nga maghimo ug usa ka green environment, magpuyo nga himsog. Atong gidapit ang katawhan sa pagpadayon sa pagtukod ug mga komunidad nga nag-alagad sa isig usa.” (Annie Libres)