Nobyembre gideklarang bulan sa KSP-PSL

Atol sa pagsaulog karon sa 50th Year sa Kasaulogan Sa Pulong (KSP)-Pangulo Sa Liturhiya (PSL) dinhi sa Arsidyosesis sa Davao, opisyal usab nga gideklarar ni Most Rev. Romulo G. Valles, D.D., Arsobispo sa Davao ang bulan sa Nobyembre ingon nga KSP-PSL Month sugod niining tuiga. Kini nahisukip sa Circular No. 41 Series of 2015 pinetsahan Septembre 9.

Sa maong Circular giila ni Arsobispo Valles ang dakung nahimo sa kalihukan sa Kasaulogan Sa Pulong sa pagmugna ug paglig-on sa mga Gagmay’ng Kristohanong Katilingban (GKK) dinhi sa Simbahan sa Davao. Matud niya, “The Kasaulogan Sa Pulong has been instrumental in the building up and strengthening of our Gagmay’ng Kristohanong Katilingban (GKKs) or Basic Ecclesial Communities (BECs)”. Dungan niini giila usab niya ang pagpangalagad sa mga PSL sa pag-ingon: “In our Sunday celebrations in the absence of a priest, the celebration of God’s Word is brought to our GKKs through the valuable service and commitment of our Pangulo Sa Liturhiya (PSLs).”

Ang kalihukan sa Kasaulogan Sa Pulong (KSP) uban ang mga nangalagad niini, ang Pangulo Sa Liturhiya (PSL) nga kanhi gitawag nga KSP Leader gisugdan sa mga misyonerong PME Fathers niadtong tuig 1965 pinaagi nila ni Fr. Andre Pigeon, PME., ug Fr. Claude Matte, PME., didto sa St. Joseph the Worker Parish sa Sta. Cruz, kanhi kabahin sa Arsidyosesis sa Davao una kini nahimulag ug nahimong Dyosesis sa Digos niadtong tuig 1980.

Sa katapusan sa Circular, giawhag ni Arsobispo Valles ang tanan: “As we hold on together in faith, hope and love, and continue to build up communities of discipleship of Jesus Christ in the local Church of Davao, I am requesting your wholehearted suppot to the yearlong diocesan celebration of our KSP-PSL”.

Sa Nobyembre 7 didto sa USEP Gymnasium sa Obrero, Dakbayan sa Davao, sugod sa alas 8:00 sa buntag ipahigayon ang panagtigom sa mga PSL alang ning maong kaugdahan. (Bong Baldoza)