UIC Mitabang sa Balay Pasilungan

ANG mga sakop nga estudyante sa religious clubs sa University of the Immaculate Conception (UIC) mitabang na usab sa komunidad sa pagsaulog sa ika-267th nga kasumaran sa kamatayon ni Venerable Mother Ignacia del Espiritu Santo, foundress sa RVM Sisters sa miaging bulan. Ginabuhat kini sa mga estudyante sa UIC isip paghinumdom sa ilang foundress, ug aron mapakita usab ang mga buhat sa Gugma.

Ang matag grupo mipili ug orphanage nga bisitahon. Gipili sa altar servers ug Youth for Christ ang Foundation of Balay Pasilungan Inc. (FBPI) nga gidumala sa Marist Fathers. Matud pa sa Campus Minister ug Moderator Mrs.Fe Sucgang, ilang napili kini tungod kay nakita nila ang mga panginahanglan sa mga bata. “…unya duol lang pud kini sa University.” Ang mga residente sa FBPI mao ang mga street boys, mga biniyaan ug mga kabus. “Ang mga bata adunay mga ginikanan ug nagabisita kanila,” matud pa sa resident worker nga si Alma Evangelista. Sa pagkakaron, mukabat sa 27 ka mga bata ang ilang giatiman nga nagaeskwela isip kinder ug elementarya.

Dayag ang kalipay sa mga dagway sa mga bata sa pagbisita sa mga estudyante ilabina sa dihang ila silang gidalitan ug mga pagkaon ug gamit pang-eskwela. Alang kanila ginagmay man kini, apan dako na kini ug tabang sa ilang pagkinabuhi didto. (Rusty Corsame | SMP SocCom)