Ang Missionaries of Jesus

Ang Congregation of the Immaculate Heart of Mary mao ang “inahan” sa Missionaries of Jesus o MJ. Kini akong nahibal-an human sa pakighimamat sa kura paroko sa Parokya sa Senior San Miguel, Marahan, Marilog District, Siyudad sa Davao nga si Rebirendo Padre Gracioso G. Charcos, MJ. Siya giila sa iyang mga parokyano nga Padre Gerry.

Natawo ang MJ niadtong ika-12 sa Hunyo tuig 2002 human misagubang ug suliran ang ang kongregasyon diin gibulag ang mga membrong Filipinong ordinadong pari. Nagtapok sila ug naorganisa ang grupo nga Missionaries of Jesus.

Nagsugod ang MJ nga adunay karisma sa Muslim-Christian dialogue, ug sa pakighimamat sa mga igsoon natong Lumad. Duna sila’y ginadumala nga tulunghaan sa Lanao ug parokya sa Arkidayosis sa Davao. Sulod sa trese (13) ka tuig isip usa ka misyonerong grupo, mikaylap ang MJ sa United States of America, Guatemala, Papua New Guinea, ug sa Pilipinas (San Mateo, Rizal, Lanao ug Davao).

Si Padre Gerry ang kura paroko sulod na sa duha ka tuig. Ang parokya aduna nay 17 ka mga Gagmay’ng Kristohanong Katilingban (GKK), ug madungagan pa kini ug usa.

Siya nga taga-Balamban Siyudad sa Cebu natawo niadtong ika-28 sa Desyembre tuig 1962. Nisulod sa seminaryo ug giordinahan isip misyonerong pari sa Parokya ni San Juan Bautista sa Taytay Rizal niadtong Mayo 8, 1993, tulo ka tuig na lang ug musaulog na siya sa ika-25 anyos sa pagkapari. Siya nakasilbi sa Senegal, Africa sulod sa siyam ka tuig; 3 ka tuig sa Mission Internship; ug 6 ka tuig isip usa ka misyonerong pari. Prinsipyo niya nga pag-ampo ang susi aron malampasan ang mga problema ug kalisod.