Pag-ampo alang sa mga patay

Diha sa 2 Mac 12:42-46 nag-ingon, “gidali gayod nila paghipos ang mga lawas sa mga tao nga nangamatay. Apan sa ilalom sa sapot sa matag patay nakita nila ang gagmay nga larawan sa mga dios-dios nga gisimba, nga gidili sa balaod…ug nangamuyo sila kaniya nga papason unta sa hingpit kining salaa. Nagpaamot usab siya ug gidala kini ngadto sa Jerusalem aron gamiton alang sa usa ka halad alang sa sala. Si Judas nag-andam alang sa usa ka halad aron malingkawas ang nangamatay sa ilang mga sala.”

Alang sa mga nangamatay
Diha sa Mat. 23:29 usab nag-ingon, “kamong mga Pariseo! Mga tigpakaaron-ingnon. Nagbuhat kamog mga maanindot nga lubnganan alang sa mga propeta ug giadornohan ninyo ang mga monumento niadtong mga maayong kinabuhi.”

Sa Biblia mabasa: “Karon, mahitungod sa mga patay nga banhawon: wala ba diay kamo makabasa sa gisulti sa Dios kaninyo? Siya miingon, ‘Ako ang Dios ni Abraham, ang Dios ni Isaac, ug ang Dios ni Jacob.’ Nagpasabot kini nga siya mao ang Dios sa mga buhi, dili sa mga patay (Mt 22:31-32, Ex. 3:6).” Kini nagpasabot usab nga si Abraham, si Isaac, ug si Jacob mga buhi, dili mga patay.

Sa 1 Sam 28:3-19 mabasa nga si propeta Samuel patay na apan nakig-istorya kang Saul ug miingon, “Ikaw ug ang Israel itugyan sa Ginoo ngadto sa mga Filitihanon. Ug ugma ikaw ug ang imong mga anak motipon na kanako.” Nagpasabot nga si Propeta Samuel, si Saul ug tulo ka anak, gilubong ang lawas nga patay (1 Sam. 31) apan buhi sila diha sa espiritu.

Hangtod karon nagpadayon ang mga basahon ug mga tawo nga moingon nga supak sa Biblia ang pag-ampo alang sa mga patay. Busa magtuon kita sa Biblia ug mosalig sa atong Simbahan kay si San Pablo nag-ingon, “aron pinaagi sa Simbahan masayran karon, ang kaalam sa Dios diha sa nagkalain-laing paagi (Efeso 3:10).