Parokya sa St. Jude, magpadayon sa paglambo

Padayon nga magmalambuon ang Parokya sa St. Jude ilabi na human nga malampusong nagsaulog kini sa ika-50 ka tuig sa pagkamugna, sa temang: “Bulawanong pagpasalamat sa Dios alang sa mapadayonong misyon sa simbahan sa kabus.”

Tungod sa kalambigitan sa nagkalain-laing sector nahimong malampuson ang kapistahan sa St. Jude, butang nga gikalipay ni Arsobispo Romulo G. Valles sa pag-ingon, “Gi-awhag kita nga mahimong disipulo ug tawagong apostoles. Nga sa walay pagduhaduha, molihok kita, magmisyon kita, ug mobalik na pud sa pagka-disipulo. Kay ang Diyos nagtawag kanato. Hulmahon kita sa hunahuna ug kasingkasing aron maandam kita. Mao kini ang atong kinaiya, held together as a family. Kung unsa man ang atong dalhon, it must be polished with mercy and compassion.”

Sa maong kapistahan gipamalandungan ni Abp. Valles ang giingon ni San Pablo nga ang batong sukaranan mao ang atong Ginoo. Busa, matod pa niya, ang kahulugan sa atong pagkakita mao ang Ginoo.

Iya usab nga gihatagan ug gibug-aton ang tawag sa mga apostoles nga mao ang ebanghelyo atol sa kapistahan ni St. Jude. Ang hagit sa ebanghelyo ni Kristo naghatud ug gugma-ug kalooy sa mga katawhang kabos; busa ang pakighiusa sa Espiritu Santo motukmod kanato nga magmainiton sa paghalad ug pagdawat sa matag tahas nga isangon kanato lisod man o sayon. Ang kaisog sa pakigbugno sa dautan mohimo kanatong lig-on sa pagtoo aron makabarog ug mahimong madaugon batok sa dautan.

Ang simbahan isip katilingban sa magtotoo nagtinabangay ug nagkahiusa sa kusog sa presencia sa Dios nga gimugna aron palambuon ug iumol aron motubo.

Siya miingon nga “modelo na ang komunidad sa St. Jude Parish sa kinabuhing Kristohanon, sa Katolikong pagtoo, ug sa pagpuyo isip simbahan.” Ug iyang gitin-aw nga dili tan-awon ang atong kaugalingon nga usa lang ka pundok kay ang kahulugan sa atong pagkakita mao ang atong Ginoo.

Ug tungod niini, iyang gipasabot nga bantayan usab ang gasa isip katilingban. Ang katilingban nagpadayon tungod kay ang Ginoo mao ang magpatubo ug gani sa sulod sa 50 ka tuig sa St. Jude Parish ang Ginoo mao ang nagpalambo niini.

Gisalmutan ang Parochial Patronal Fiesta sa mga sakop nga GKK pina-agi sa gihimo nga GKK Panaw-duaw o Pilgrimage sa nagkalainlaing kapilya diin usa usab ka Pilgrimage Mass ang gisaulog. Nagkalin-laing kalihokan ang gipahigayon nga mihalambigit usab sa mga establisamento apil ang mga eskwelahan, ug ang barangay nga nahisakop sa maong parokya.

Ang ilang kasaulogan nahimo usab nga mabulokon tungod sa partisipasyon sa mga nangaging kura-paroko. Ang uban kanila ming-saulog usab sa Novena Mass. Ang unang Novena Mass ug unang misa sa adlaw sa kapistahan, gipangulohan mismo sa Parish Priest nga si Fr. Pete Lamata ug concelebrants ang iyang kaubang mga pari sa parokya nga sila Frs. Paul Dagangon, Jorge Angga, ug Zaldy Abonales. Misaulog usab sa mismong adlaw sa pista si Msgr. Edgar Rodriguez,Msgr. Leonardo Vicente, Abp. Em. Fernando Capalla, Bp. George Rimando, ug si Abp. Romulo Valles.