DXGN 89.9 Spirit FM nangandam alang sa regular programming

Gipangandaman na karon sa Archdiocesan Commission on Social Communications ubos sa Davao Verbum Dei Media Foundation, Inc. ang pagsibya subay sa regular nga programming. Kahinumduman nga nagsugod ug test broadcast niadtong tunga-tunga sa bulan sa Disyembre sa dihang na-instalar ang bag-o nga transmitter nga nagasibya sa kusog nga 10,000 watts.

Samtang gipanid-an pa ang operasyon sa transmitter, nagpadayon ang pagpanday sa plano sa programa pinaagi sa pakiglambigit sa nagkalain-laing mga pundok sa layko, kamadrehan ug kaparian ug ingon man sa mga pastoral nga mga ahensiya lakip na ang mga parokya ug mga Gagmay’ng Kristohanong Katilingban.

Atol sa pinakaulahing panagtagbo sa mga sakop sa Davao Verbum Dei, gipadayag ni Arsobispo Romulo Valles ang kalipay nga dunay ubay-ubay nga mga kapunungan sa layko, parokya, GKK ug uban nga mihatag sa ilang commitment sa pagsuporta sa mga programa sa DXGN 89.9 Spirit FM.

Lakip sa mga programa nga gi-andam alang sa tanang mga katawhan mao ang kalabot sa init nga mga panghitabo nga nahilambigit ang komunidad, mga isyu sa kabataan ug mga ginikanan ug Kristohanong Pamilya, ug daghan pang mahinungdanong pagtulun-an.

Sa pagkakaron padayong giinstalar ang tanan nga studio equipment samtang gipaabot pa usab ang pag-release sa kumpleto nga mga dokumento alang sa full blast nga pagsibya.

“Nanghinaut kita nga makasibya ta sa atong regular programming karong pipila ka mga adlaw, sa panahon nga gitagana sa Ginoo,” si Fr. Ritsche Gamaya Direktor sa Social Communication nagkanayon, “dili lamang kita mabalaka ug padayon kita nga mag-ampo alang sa kalampusan ning atong mga paningkamot tungod ug alang sa pagpakaylap sa Maayong Balita.”