Pag-ampo sa usa ka magtotoo

Amahan namong langitnon, Magbubuhat sa langit ug sa yuta, ang tinubdan sa gugma ug sa kalinaw. Mapu-angoron nagapangayo kamig pasaylo sa among mga kalapasan; sa mga kasakitan na among nahimo Kanimo.

Amahan, nagapanghadlok kami karon tungod sa nahitabong pagbusikad sa usa ka bomba didto sa Roxas Boulevard. Nahadlok kami tungod kay ani-a na gayud sa among tugkaranan ang kasamok ug kagubot.

Midangop kami Kanimo karon Amahan. Ilikay mo kami sa mga kaangol; sa mga panghasi sa among mga kaaway; sa mga plano nga dautan diri sa among dakbayan.

Bantayi, ang among nasod Pilipinas ug ilikay kini sa mga kagubot. Ayaw kalimti usab Amahan ang among mga sundalo ug mga pulis nga panahon sa ilang operatiba batok sa terorismo, dili modaug kanila ang dautan.

Labaw sa tanan Amahan, among gituboy diha kanimo ang among Presidente sa Pilipinas. Nanginahanglan siya Ginoo sa imong panabang ug proteksiyon labaw na karong panahona nga gina atubang niya ang hulga sa kagubot; ang pagpanghasi sa terorismo.

Ayaw itugot nga modaug ang mga planong kagubot sa mga dautan. Ang imong kalinaw, kaluoy, ug kaayuhan lang ang ipatigbabaw diri sa among mga dughan.

Dawata sa imong gingharian ang mga kalag sa mga nangamatay sa Roxas Boulevard. Ug ayaw itugot Amahan nga mausab pa kadto. Ayaw itugot ang “state of lawlessness” diri sa among nasud.

Kini among mga pangamuyo sa ngalan ni Jesus inubanan sa pangaliya ni Birhen Maria. Amen. (Weng Nuera)