San Pedro Calungsod-Parish gisindihan na ang unang kandila sa Adbiento

Ang San Pedro Calungsod Quasi-Parish nagpahigayon ug misa isip pagsugod sa Adbiyento niadtong Nobyembre 27. Pinangulohan ni Rev.Fr. Ricky T. Flores, DCD, gibenditahan ug giampuan niya uban ang katawhan ang “Advent Wreath” nga nahimutang sulod sa simbahan.

Gisindihan sab niya ang usa sa mga kandila, isip simbolo sa unang semana sa Adbiyento. Iya pud gipaambit sa iyang homiliya nga ang Adbiyento, mao ang panahon sa pagbag-o sa kaugalingon aron mahimong maayong sumbanan diha sa katilingban ug sa pamilya.

Matud pa ni Mary Jean Olmedo, usa ka PSP sa Immaculate Conception GKK isip pagpangandam sa pag-abot sa Ginoo, “magpadayon sa pagpangalagad, makanunayon sa pag-ampo, ug andamon ang kaugalingon sa umaabot nga ikaduhang kinabuhi,” ang iyang amguhon karong panahona.

Dugang sab ni Marcel Rose Mabida, usa ka batan-on, maningkamot siya sa pagtambong sa Santos nga Misa ug mag-ampo sa kanunay. “Ang pagpangandam ug ang pagbag-o usa ka personal nga desisyon.”

Sa pikas bahin, si Erf Louie Canamo miingon nga, “maghinulsol ta sa mga sala nga nabuhat ug magpasaylo ta sa mga nakasala kanato. Hinumduman sab nga kanunay tang mag-ampo.” (Lorelyn Lahoylahoy | SPQP SocCom)