Walk for Life sa Digos gipahigayon

Nagkahiusa ang liboan nga mga magtotoong Katoliko niadtung Marso 17 nga naggikan sa nagkadaiyang parte sa Davao Occidental ug Davao Del Sur sa gipahigayong Walk For Life sa Dakbayan sa Digos.

Ang maong aktibidad gipanguluhan mismo sa Obispo sa Diocese sa Digos nga si Bishop Guillermo Afable, DD aron ipasibaw ang ilang pagbabag sa Absolute Divorce and Dissolution of Marriage Bill.

Sumala ni Bishop Afable nga ang Kaminyoon sagrado ug Misteryo nga angay palamboon, sumala pa nga ang maong balaodnon mas makapahuyang sa Pamilya ug Kaminyoon. Mas maayong mohimo ug lakang ang mga magbabalaod nga mas makapalig-on sa kaminyoon ug pamilya. Kung adunay problema ang mag-tiayon angay kining sulbaron.

Tungud sumala pa ang Divorce Bill ang hilabihang apektado niini ang mga kabataan.

Giklaro ni Bishop Afable nga wala magkulang ang simbahan sa paghiusa ingun man paglig-on sa panag-uban sa mag-tiayon ilabi na diha sa Parokya adunay gihimong programa. Ilabi na sab ngadto sa mga kaslonon pa, sama na lamang sa paghatag og seminar, marriage enrichment retreat, aduna say grupo sa simbahan nga nagapahigayon og marriage encounter ingon man Christian Life Program sa mga magtiayon.

“Ang kaminyoon sagrado ug misteryo nga angay lig-onon ug palamboon ug palungtaron. Sa atubangan sa mga kalisod ug kasakit sa kaminyoon ug pamilya angay mamatngonan ang presensya ni Jesus nga gìsakit ug gibiyaan apan nabanhaw,” butyag ni Bishop Afable.