5th Evangelization 2033 Mindanao Convention gipahigayon sa Tagum

Abril 26-28, 2018. Gipahitabo ang 5th Mindanao Convention na adunay tema nga “Renewed servant leaders for new evangelization” didto sa Queen of Apostles College Seminary. Gitambongan kini ug kapin 300 ka mga participante sa nagkadaiyang Diocese.

Sa unang adlaw, alas 5:00 sa hapon gipangunahan ni Most Rev. Wilfredo D. Manlapas, DD Bishop of Tagum ang Santos nga Misa. Nisunod niini ang paghimamat sa mga participante sa nagkalain laing Diocese “Davao, Digos, Tagum, Mati (DADITAMA).”

Abril 27, 2018. Biyernes, ikaduhang adlaw, sayo pa lang sa buntag gisugdan na nila kini sa Personal Hour with the Lord, naghatag pud ug mensahe si Most Rev. Guillermo D. Afable, usa ka obispo gikan sa Diocese of Mati, gipangunahan usab niya sa Santos nga Misa sa ika-duhang adlaw sa maong convention.

Sa hapon mao ang First conference mahitungod sa Servanthood in Todays Challenges (spiritually mission) ni Rev. Fr. Edilberto R. Mahinay, DADITAMA director, ug ang second conference ni Rev. Fr. Arnold Tiplaca, Rector sa Queen of Apostles College Seminary, nga mahitungod sa Comtemplating the Priesthood of Christ isip usa ka magsasangyaw.

Alas 8:00 sa gabii gisugdan nila ang usa ka programa nga KASADYA diin ang matag Diocese mipresenta sa ilang nakadaiyang mga talento pinaagi sa kanta, sayaw ug drama.

Matud pa sa partisipante nga si Nanay Desarie Navaro Quiniquito ang nakapadasig kaniya nga muapil ani nga convention kay ang iyang dakung pagtoo sa ilang kumonidad isip usa ka magsasayangyaw, ug isa sa iyang gina tuohang pulong sa Ginoo na “kung asa ko, tua kamo”, nga kini nga magsasangyaw padayon ang pagdasig sa katawhan nga walay pili, mapabata man o mapahamtong, mapa pobre man o mapa dato. Sa unom ka tuig ni Nanay nga usa ka magsasangyaw nahimo kini niyang inspirasyon sa kinabuhi. Para kaniya sa bunyag nag sugod ang atung misyon. Mahinungdaon alang kaniya ang pag sangyaw sa maayong balita tungod nabati niya ang lawom nga paghigugma ni Jesukristo kanato ug isip usa ka magsasangyaw ni nanay Desarie, para sa iya ang iyang lawas usa ka instrumento na andam magpagamit sa balaang Espiritu Santo.

Ug alang usab ni Rosito Estacosa Jr., Grade 12 ug usa ka sakristan sa San Isidro Labrador Parish, Diocese of Tagum ug kasamtangang seminarista, sa pagsulod pa gyud niya sa unang adlaw, nakita na niya ang unity ug paghimamat sa uban. Nalingaw siya sa praise and worship kay sa kining paagi niya napagawas ang iyang emosyon ug ang kainit sa iyang gugma alang sa Ginoo. Iya usab nga natun-an nga ang usa ka evangelizer dili lang kay leader apan siya isa usab ka servant.

Malipayon usab si Rosito nga kabahin siya niining convention nga dili niya masabtan o matukid tungod kay wala damhi nga makaapil siya tungod sa financial problem. Pero tungod sa tabang ni Lord ug sa iyang mga kauban sa ilahang mga suporta nakaapil gayud sya.

Amo usab napanayam ang usa sa organiser ani nga Convention nga si Rodeta Cortez gikan sa Diocese of Tagum.

Ang tumong ani nga convention ang mapakusgan ang karun nga pagsalig ug pagtoo sa nagkadaiyang indibidwal labi na karon kay gecelebrar ang Year of the Clergy and Consecrated Persons ug mapalawum pa ang pagtoo sa Ginoo labaw na sila isip magsasangyaw ug nga madungagan pa ang maong kadasig diha sa ilang pagsangyaw labaw na karun na natunong sa year of the consecrated person, nga mutabang sa kaparian sa pangsangyaw.

Nagpasalamat usab siya sa Ginoo tungod wala niya sila pasagde sa unsa pa kalisod sa panahon, nakaya nila ang maong mga kalisdanan sa pagpangandam niing aktibidad.

Labing mahinungdanon para sa tanan ang maong convention kay matud pa, pinaagi aning panagtapok mas mapalawom nila ang pagtoo, pagsalig ug paghigugma sa Ginoo ug sa mga kauban nga mga magsasangyaw sa pulong ug maayong balita sa Diyos. Ug natapos ang maong aktibidad nga malinawon, malipayon ug dala ang maong mga mensahe na ilang natun-an nga makapadasig pa kanila sa pagpadayun sa pagpangalagad diha sa Ginoo. (Angel Mar Valencia | Diocese of Tagum)