Duha Ka Pari Ug Duha Ka Deakono Gi Ordinahan

Usa ka adlaw ang milabay, human ang Canonical Installation ni Bishop Raul Dael sa San Nicholas De Tolentino Cathedral sa Rosario, Tandag City, Surigao Del Sur, alang sa iyang hingpit nga pagdumala sa Diocese sa Tandag.

Duha ka pari ug duha ka deakono ang gi-ordinahan sa maong Cathedral, niadtong Hunyo 15, 2018, ug ang nahimong Principal Consecrator mao si Bishop Emeritus Nereo Odchimar, DD nga gitambungan mismo ni Bishop Dael ug ni Bishop Emeritus Ireneo Amantillo, CSSR, DD.

Giila ang mga gi-ordinahan sa pagkapari nga si Rev. Fr. Rolly Cabuga, 32 anyos, gikan sa San Ignatio De Loyola Parish sa Barangay Balite, Bayabas, Surigao Del Sur ug si Rev. Fr. Rodrigo Rañez, Jr., 31 anyos, gikan sa Santo Niño Parish sa Marihatag Surigao Del Sur, ug ang mga gi-ordinahan pagka-Deakono si Rev. Rodel Alameda, 27 anyos, sa Santo Niño Parish San Agustine, Surigao Del Sur ug Rev. Jonathan Gomez, 32 anyos, gikan sa Saint John De Baptist Parish sa Barangay Diatagon, Lianga, Surigao Del Sur.

Sumala ni Bishop Dael, nga gikalipay niya ang pag-abot niya sa Tandag City niadtong Hunyo 13 tungod gisugat siya sa bagang duot sa katawhan, apan mas nadugangan ang nakapahimoot kaniya tungod sa duha ka pari ug duha ka deakono nga gi-ordinahan.

Gipahimangnoan sa Obispo ang duha ka deakono nga dili magpundo sa bishop house aron mabansay nila ang ilang pagka-deakono, sumala pa nga kinahanglan mogawas sila, ug mamunyag sa mga kabataan ug mag alagad sa mga kabus, ingon man magpaabot na lamang kini sa mga mando kung hain sila i-destino.

Samtang ang duha ka bag-ong pari, gihatagan gilayon sa Obispo ug usa ka buwan nga bakasyon, apan giklaro ni bishop Dael nga dili kini aron modako ang ilang mga tiyan, apan ilang pagabalikan ang mga tao nga nagtabang kanila ingon man ang mga tao nga nahimong kabahin sa ilang pagtubag sa tawag sa labawng makagagahum, samtang dugang pahimangno kanila sa Obispo nga dili dapat sila mahimong kurap ilabi na sa panalapi gikan sa katawhan.