DACS Basic Education Sportsfest 2018

Pagahimoon sa St. Peters College of Toril ang opening Program sa Basic Education Sportsfest 2018 nga programa sa Davao Association of Catholic Schools, Inc. kon DACS karong umaabot nga Septyembre 01, 2018.

Gikan sa 26 ka myembro nga tunghaan sa DACS 24 kanila musalmot sa nahisgutang pag-ugnat sa kusog sa mga studyante sa Secondarya ug Elementarya nga langkuban kini sa mukabat kapin usa ka libo nga mga atleta.

Alas otso sa buntag sugdan kini sa Misa nga pangulohan ni Rev. Fr. Russel Bantiles, Vice President for Academics, sa Holy Cross Of Davao College.

Ang mga dula nga pagatigian sa mga atleta mao ang Basketball, Volleyball, Chess, Table Tennis, Badminton, Taekwondo, Sepak Takraw, Football, Rugby ingon man ang Swimming.

Sumala ni Jimmy-loe Dela Vega, Executive Director sa DACS, nga ang tumong ug tuyo sa maong patigayon nga dili lang kini usa ka simple nga sportsfest, usa kini ka program nga aron pag develop ingon man paglambo dili lang sa atleta apan lakip na sa tanang nalambigit niini, ilabi na ang mga trainors/couch ug mga komitiba, sumala pa nga gusto nila nga maka tukod ug usa ka lig-on nga panaghiusa, sumala pa nga ang tanan dili alang sa kompetisyon apan lakip na sa pag umol sa pagserbisyo diha sa komunidad uban sa tema “Champions for Christ: Call to Service and Holiness”.

Samtang sa pikas bahin gikabutyag ni Danny Louie Lico sa Saint Peters College of Toril nga dakong pagpangandam ang ilang gihimo alang sa okasyon ug iyang gisiguro ang luwas nga seguridad sa tanan, ilabina nga aduna silay mga security guard nga anaa mismo sa sulod sa tunghaan, ingon man nag-request na sab sila ug ginsakupan gikan sa Toril Police Station nga anaa mag standby sa gawas sa tunghaan aron maka responde kung adunay kakulian, samtang sa sulod mismo sa tunghaan adunay First aid station ug adunay tulo ka nurse ug ginsakupan sa Red cross alang sa emerhensiya.

Samtang ang Davao Association of Catholic Schools nagbutyag nga aduna nay daghang gikan kanila ang mga nilambo sa pagpaugnat sa kusog, usa na ang gihinganlan nga si William Butch Ramirez ang kasamtangang Chairman sa Philippine Sports Commission nga kanhing nagtuon sa St. Michael School of Padada Davao del Sur.

Samtang ang maong patigayon magluntad sa Septyembre 8, 2018.