Mo-uyog nga kombento gi-ilisdan na

Gipangulohan mismo ni Bishop Guillermo Afable, DD, ang obispo sa Diocese sa Digos ang pag-blessing sa bag-ong kombento sa St. Michael Parish, Padada, Davao del Sur niadtong adlawng Sabado.

Sumala sa kura paroko nga si Rev. Fr. Jupiter Canoy, DCD nga nahimo na gayong katumanan ang pangandoy sa mga parokyano nga mailisan na ang ilang karaan na ang kombento, ilabina nga mo-uyog na kini ug posible nga dali ra sab kini nga masunog tungod sa iyang materyales.

Sumala pa nga nagkantidad ang budget sa maong kombento sa 7.5 million pesos.

Mibutyag ang maong pari nga naggikan ang maong pundo sa panagtambayayong sa katawhan, ilabina nga aduna silay nagkadaiyang fundraising activity nga gipahigayon aron lamang maka tigom sa maong kantidad.

Dugang pa nga ang daan nga kombento mikabat na sa kapin 60 ka tuig tungod mao kini ang daan nila nga simbahan nga gigamit kaniadto sa mga PME Fathers.

Samtang mibutyag si Robinson Bulat-ag Jr. kinsa mao ang foreman sa maong proyekto nga aduna kini duha ka andana nga adunay gisukdon nga 12×16 square meters ang gilapdon, gilangkuban na sa upat ka kuwarto ang anaa sa ikaduhang andana ug ang unang andana adunay unom ka kuwarto.

“Sigurado jud mi nga kini nga project lig-on jud kaayo ni basta Ugnayan Builders,” butyag sa foreman.

Samtang mikabat sa 7 ka bulan ang construction sa maong kombento.