Pagkamanggihatagon sa mga Lumad, buot ipadayon sa Kura Paroko

Gi-awhag sa Parish Priest sa Santo Rosario Parish, Malita, Davao Occidental nga si Rev. Fr. Kim Cossid, DCD ang mga kaigsoonang Blaan sa Sitio Kisoy, Little Baguio, sa maong lungsod nga ipabilin ang ilang pagkamanggihatagon sa usa’g usa, ilabina diha makita ang pagkamahigugmaon nila sa uban.

Ang maong pag-awhag atol sa kapistahan sa ilang patron sa GKK nga si San Miguel Arkanghel. Mibutyag ang maong pari nga nasayod siya nga adunay tradisyon ang mga Blaan nga pagkamanggihatagon, usahay dili na maghunahuna nga adun pa bay nahabilin sa ilang pagakaonon pagka ugma basta aduna lamang ikadalit ngadto sa isig kaingon, ilabina ngadto sa mga bisita.

Sumala pa nga usa kini ka maanindot nga kinaiya nga maayong ipabilin, sama sa gihimo sa Labawng Makagagahom ang pagpangga kanatong tanan.

“Nakabalo ba mo nga sa inyong paghinatagay naa diha ang gugma? Ug mao nay maayo,” butyag ni Fr. Cossid sa iyang homiliya sa gipahigayong Misa alas 10 sa buntag niadtongSeptyembre 20, 2018.

Samtang nahibaloan nga nahimong Kristiyano ang mga kaigsoonang lumad sa maong lugar, pinaagi sa pagsangyaw sa misyonero nga Canadian nga si Fr. Pierre Samson, PME. Mikabat na sab sa 24 ka tuig ang maong GKK, apan ang pagsaulog sa maong kapistahan nga adunay patron anaa na kini sa 7 ka tuig.

Nahimong panginabuhian sa mga kaigsoonang Blaan sa maong lugar mao ang pagpananom sa upland rice, mais, abaca ug ang kape. Diha sa ilang pagpananom, bisan taliwala sa ilang kalisod, wala sila nawad-an sa pagtoo ngadto sa Labawng Makagagahom.

Ingon man gipabilin nilang buhi ang pagtoo sa Ginoo, pinaagi sa paghinatagay kon unsa man ang nahimong abot sa ilang kakugi sa kaumahan.