1st Mindanao Conference on New Evangelization naghagit sa kabag-ohan sa Simbahan

Kapin 80 ka mga delegado gikan sa nagkadaiyang Diocese sa Mindanao ang misalmot sa 1st Mindanao Conference on New Evangelization sa Marie Rivier Retreat House, Catalunan Grande, Davao City uban sa tema “New Fervor, New Zeal for the Church of Mindanao” niadtong Oktubre 15 hangtod 19 tuig 2018.

Ang maong aktibidad gipangulohan sa Obispo sa Diocese sa Digos nga si Bishop Guillermo Afable, D.D. kinsa mao usab ang National Director For New Evangelization 2033.

Sumala ni Bishop Afable nga ang tanan mamahimong kabahin sa kalambuan ug kabag-ohan sa simbahan apan mahimo lamang kini kung ang tanan napuno ug gibag-o sa balaang Spiritu Santo.

Ang mga delegado gilangkuban sa mga layko, deakono, kaparian, kamadrehan ug kaobispohan.

Gipangulohan ni Bishop George Rimando, D.D. Auxillary Bishop sa Archdiocese sa Davao, ang misa sa pag-abli alas kuatro y medya sa hapon niadtong Oktubre 15, 2018. Sumala ni Bishop Rimando nga sa dihang seminarista pa siya niadtong 1980 nalambigit na siya sa pagtukod ug pagpalambo sa Gagmayng Kristohanong Katilingban kon GKK didto sa Diocese sa Tagum. Nagtuo siya nga kining maong aktibidad makatabang sa paglig-on sa katawhan ilabina sa mga lideres sa GKK.

Dugang sa Obispo nga tungod niini masabtan sa katawhan ang ilang papel isip kabahin sa pagpalambo sa pagtoo diin niadtong tuig 1991 gihisgutan na kini sa 2nd Plenary Council of the Philippines kon PCP2 diin ang kaparian, relihiyoso, kamadrehan, layko ug mga obispo nag-ambit sa pagpakaylap sa Maayong Balita.

“Diha sa pagpakaylap sa maayong balita, ang simbahan usa ka misyonaryo, ang tanang binunyagan basi sa bunyag, kinahanglan na aktibo sa partisipasyon. Sa GKK ang matag usa madasig, ilabina ang layko maoy pinakadaghan nga pundok sa sakop sa simbahan,’’ sigun ni Bishop Rimando.

Dugang niya nga 40 ka tuig human ang pagtukud sa GKK kinahanglan ang pagpadayon sa Pormasyon, diha nanukad na kini sa bunyag ang pakigsuod kang Kristo, nga ihulagway kini sa buhat ug pulong sa GKK, Parokya ug matag Diocese. Ang nahisgutang aktibidad sumala pa makapapukaw nga ang tanan adunay misyon isip lawas ni Kristo nga mao ang simbahan.

Ang maong aktibidad suportado usab sa Arsobispo sa Archdiocese sa Zamboanga nga si Bishop Romulo Dela Cruz, DD kinsa mitambong gayod niini.

Usa sa nahimong dinapit nga mamumulong mao ang International Director for the New Evangelization 2033 nga si Rev. Fr. Gino Henriques, CSsR nga naggikan pa sa nasod sa Singapore.