Giduso ang Evangelization 2033

Sa First Mindanao Conference on New Evangelization nga nahitabo niadtong Oktbre 15-19, 2018 sa Rivier Retreat House, Davao City, giduso sa mga delegado ang pastoral nga panglantaw sa Evangelization 2033, ngadto sa mga kadagkuan sa Simbahan dinhi sa Mindanao nga dawaton ug ipahigayon pagapil niini sa padayong pagtuman sa misyon sa 21 ka simbahang lokal.

Ang Evangelization 2033 dili bag-o, ni bag-ong kapunungan, ni bag-ong kalihokan. Nagalantaw lamang kini sa tuig 2033. Ang Evangelization 2033 usa ka dakong kalihokan sa tibuok kalibutan diin ang mga niduyog niini nagalantaw sa pinaka dakong hubileyo sa kaluwasan: ang ika-2000 nga kasumaran sa kamatayon, pagkabanhaw ug pagsaka sa langit ni JesuKristo ang atong Ginoo ug manunubos sa kalibutan. Kini ang pinakadakong hitabo sa kasaysayan sa kalibutan – ang iyang katubsanan ug pagkahiuli sa Dios. Kon kaniadto sa tuig 2000, gisaulog ang Hubileyo sa pagpanganak kang JesuKristo sa Bethlehem, sa 2033 saulogon ang hubileyo sa tanang hubileyo – ang katumanan sa gisaad sa Amahan sa pagbuntog sa sala ug sa kamatayon didto sa Jerusalem, ug nagapadayon karon diha sa Simbahan.

Aduna kini’y 3 ka hugna sa pagpangandam: Una, gikan sa 2012-2020 Ang pagbag-o sa mga namunoan sa Simbahan – mga Obispo uban sa ilang mga Kaparian ug Diakono. Ikaduha, gikan sa 2021-2029 Ang pagdasig ug pagpahigmata sa mga layko ngadto masangyawon nga pagkasumusunod ni Kristo. Ikatulo, 2030-2032 Saulogon si Jesus pinaagi sa paghalad kaniya sa pinaka daghan kaayong tawo nga nasangyawan ug nagbag-o sa kinabuhi tungod Kaniya, nga ilang naila, gimahal, ug gisunod.

Gipanghinaot sa mga kapin 80 ka mga delegado nga patalinghugan ang ilang girekomendar sa mga kaobispohan uban ang ilang mga Pari nga kauban sa walay paglanganlangan aron modilaab pagusab ang kalayo sa pagtoong masangyawon. Daghan na kaayo ang mga nahisalaag, nabiyaan, ug nahikalimtan kinsa kinahanglan balikan ug kuyugan pagusab sa panaw sa kinabuhi ug pagtoo.

Kinsa may mahisakop niining Evangelization 2033? Ang tanang Kristiyano. Ang tanang binunyagan. Ang tanan, maoy misyonerong sumusunod ni Kristo. Ang tanan, masangyawon nga sumusunod ni Kristo. Busa, tanang Obispo, tanang Pari, tanang layko, tibuok pamilya, tibuok parokya, tibuok GKK, tanang pundok sa Simbahan. Walay exempted. Tanan gimandoan: “panglakaw kamo, sa tanang katawhaw, himoa silang akong mga tinun-an, bunyagi sila sa ngalan sa Amahan, sa Anak, ug sa Spirito Santo, tudloi sila sa tanang akong gisugo, ug tan-tan-awa, magauban ako kaninyo hangtod sa katapusan sa kalibutan” (Mt 28:19-20). Busa, maghiusa kitang tanan ug magtininuod sa pagtuman sa gisangon nga tahas sa pagsangyaw nga madasigon, malipayon, masaligon sa gahom sa Spirito Santo sa pagbag-o sa nawong sa yuta.