Kalinaw Mindanao, Now!

DAVAO CITY — Gisaulog sa mga nagkalahi-lahing sektor sa relihiyon ang Mindanao Week of Peace 2018 kun MWP nga gigiyahan sa temang ‘Peace through Dialogue: Our Destiny’ atol sa pag-abli niini niadtong Nobyembre 29, 2018 sa Brgy. 23-C, Mini Forest, Darussalam, Quezon Boulevard, Davao City.

Kini usa ka week-long celebration nga kada tuig nga ginapahigayon. Gisugdan kini tuig 2001 pinaagi sa Presidential Proclamation no. 127 nga naga deklara sa pagselebrar sa Mindanao Week of Peace gikan sa ikaulahing Huwebes sa Nobyembre hantod sa unang Miyerkules sa Disyembre. Karong tuiga, ang kining selebrasyon nagsugod karong Nobyembre 29 hantod Disyembre 5. Ang Mindanao Week of Peace usa kahigayon aron ang mga kaigsuonang tribu sa Muslim－Maranao, Maguindanao, Tausug, Kalagan ug Iranun, tribu sa Lumad, pundok sa mga Protestante, mga Kristyanos ug ang mga Katoliko nga magkahiusa bisan pa sa nagkadaiyang pagtuo.

“Importante ni nga kasaulugan aron makamugna ta ug kultura sa kalinaw sa Mindanao,” sumala pa ni Rev. Fr. Pedro Lamata. Dungag pa niya nga kung naay ‘sustainable peace’ o malahutayon nga kalinaw sa Mindanao, kini maoy magdala ug kalambuan sa Mindanao ug sa tibuok nasud. Samtang mi-isplikar sab sa iyang bahin si Dr. Aleem Hamid A. Barra, Board Member sa Bishops-Ulama Conference sa pagpasabot ngano importante ang kalinaw. “Peace is the socio-cultural solution and this is what we are doing right now,” matud pa ni Barra.

Dili lang ang pundok sa relihiyon ang parte ani nga pag selebrasyon. Mihatag sab ug suporta ang lokal nga pang-gamhanan. Mipaabot si Hon. Mayor Sara Duterte-Carpio nga magpabiling peace-loving ang mga Dabawenyos. Mihatag sab ug pasalamat ang Brgy. Chairman Alimodin Usman sa Brgy. 23-C, kung asa gipahigayon ang pag-abli sa MWP.

Atol sa pag mugna ug pagkab-ot sa kalinaw, dunay pipila ka mga aktibidad ang paga himuon atol sa pagsaulog sa Mindanao Week of Peace. Karong Disyembre 3, Lunes, paga himuon ang flag ceremony sa City Hall grounds, nga magsugod sa alas 8 sa buntag. Paga himuon pud ang Gathering for Peace in Mindanao anang adlawa. Sa Disyembre 5 nga mao ang ulahing adlaw sa MWP, dunay ‘Bisita Mosque, Bisita Simbahan’. Kini usa ka ‘Pilgrimage of Peace’. Unang bisitahon ang Mosque sa mga Muslim sa Brgy.23-C, sunod sa nga bisitahon ang San Pedro Cathedral ug ang City Church sa United Church of Christ in the Philippines o (UCCP) nga nahimutang sa Bonifacio. Tumong niini ang pagpasabot sa mga nagkalahi-lahing pamaagi sa kultura ug pagpamuyo sa relihiyon.

Para kay Aleem Mahmod Mala Adilao, dako ang epekto sa Mindanao Week of Peace sa pipila ka tuig nga kini gina siugda. “Dunay nahitabo nga panaghiusa sa Muslim-Christian community sa Davao ug sa tibuok Mindanao. Daghan gubot, mga complains nga among na reconcile.” Nagpaabot sab siya ug mensahe sa tanan nga dili kita angay mag duha-duha sa pagsuporta ug pagtabang sa mga kalihukan para masabtan ang kalinaw.

Sa mga ginahimong pagpamulong ug lakang sa pagkab-ot sa kalinaw, ablihi ang paghuna-huna ug imong kasing-kasing kay ang kasing-kasing sa kalinaw, mao ang kalinaw sa kasing-kasing. Kalinaw Mindanao, Now! (Sheena Rose Leteral, HCDC Masscom Intern)