Bag-ong ‘Online Payment System’ gilusad

Gibutyag ni OIC–City Treasurers Office, Erwin Alparaque kaniadtong milabay nga Enero 10, adlawng Huwebes ang gilusad nga ‘online payment system’ alang sa buhis sa mga negosyo ug uban pang may kalibutan niini.

Mamatikdan nga adunay daghang negosyo ang ania sa dakbayan sa Dabaw ug ubay-ubay pa ang ginapatukod nga nagahimo sa siyudad nga sentro sa atraksyon, mahitungod sa paghatag niini sa panginahanglan sa katawhan. Lakip sa nagkadaghang negosyo, ang nagkadakong ihap sa mga ‘tax payers’ nga gikinahanglan motuman sa ilahang responsibilidad sa lokal nga panggamhanan.

Nahimong dakong bentaha ang pagmugna sa ‘online payment system’ alang sa business tax payers nga adunay laing katikaran kabahin sa ilahang negosyo. Kini nga bag-ong sistema kay gipalapnag pinaagi sa paghatag og flyers o leaflets. Kauban ang Land Bank of the Philippines ug ang Development Bank of the Philippines nga duha ka government accredited depository nga bangko, namahimong posible ang pagmugna sa bag-ong sistema sa pagbayad sa mga business tax.

Dili madugay, kini nga bag-ong sistema kay mamahimo nang ma-access karong bulan sa Enero. Dili lamang kini makatabang sa mga negosyante pero lakip na usab ang mga katawhan sa siyudad nga adunay plano nga magtukod sa ilahang negosyo ug hilabi na sa pagpagaan sa proseso. (Alodia M. Luy | HCDC Intern)