Pahinungod sa Batang Hesus: Kapistahan sa Sto. Niño gisaulog

TAGUM CITY — Sa kapistahan sa Batang Hesus kon Sto. Niño gihimo sa mga parokya ug kapilya kansang patron mao ang Sto. Niño ang mga nagkalain-laing kalihukan isip pahinungod sa Batang Hesus.

Niadtong ika-12 sa Enero 2019, mao ang pagsaulog sa ika-30 nga kapistahan ni Sr. Santo Niño sa Parish of Christ the Eucaristic King diin gitambongan ug kapin 10,000 ka mga parokyano, dili lamang sa PCEK apan usab sa mga tawo gikan pa sa nagkalain-laing lugar sama sa Davao, Comval ug uban pa.

Gisugdan ang maong kapistahan og Santos nga Misa nga gipangulohan sa halangdong Obispo sa Diocese of Tagum nga si Bp. Medil Aseo. Dako ang iyang pagpasalamat sa mga tawong nahimong kabahin sa maong kapistahan ug usab ang ilang Parish priest nga si Fr. Pat Aborde. Dako ang iyang pagpasalamat sa iyang mga gisangpan diin misakripisyo alang sa kalamboan sa maong aktibidad.

Misunod sa misa ang indak-indak sa kadalanan diin makita nato ang mga parokyano nga bitbit ang ilang nagkadaiyang imahe sa Sto. Niño. Nasaksihan usab ang nagkalain-laing float nga adunay disenyo nga mga bulak ug naa sa ibabaw ana ang Sto. Niño.

Sa matag float usab adunay speaker diin gipatugtog ang kanta sa Sinulog aron nga ang mga katawhan nga nagsunod manayaw kauban ang ilang Sto. Niño. Kapin isa ka oras ang pagprosesyon libot sa down town area. Sa pag-abot sa imahe sa Sto. Niño sa simbahan sa Parish of Christ the Eucharistic King gipantaas nila ang mga imahe nga ilang bitbit sabay siyagit VIVA PIT SEÑOR!

Nahuman ang maong selebrasyon nga hingpit ug nakita gayud nato nga ang matag usa malipayon ug nabulahan gayud sila og gasa nga gikan sa Sto. Niño.

FLUVIAL PARADE SA STO. NIÑO

Usa na pod ka selebrasyon alang sa kapistahan sa Sto. Niño ang gipahitabo didto sa Sto. Niño Parish of Mabini, Comval Province niadtong Enero 13, 2019. Kabahin sa selebrasyon gipahitabo nila ang Fuvial Parade diin gitambungan ug kapin 500 ka mga deboto sa Sto. Niño.

Adunay 67 ka mga bangka nga ningduyog sa maong selebrasyon ug adunay sulod nga mga tao sa nagkadaiyang organisasyon sa simbahan.

Matod pa ni Fr. Ben, ang Fluvial Parade o Fluvial Procession usa ka ideya nga gikan sa mga parokya ug mao usab kini ang ginabuhat sa Sto. Niño sa Cebu City aron sa pagbuhat pag-usab ang nakasanayang tradisyon kay matod pa sa storya nga ang Sto. Niño gidala sa mga Espanyol gikan sa barko, mao nang parte gayud ang tubig sa pagsaulog sa maong prosesyon.

Agi usab sa pagsunod sa maong tradisyon ginapaningkamotan usab nila nabuhat nila ang tradisyon nga naandan sa Cebu. Una, ilahang sunduon si Maria nga mao ang inahan ni Jesus ug adto usab sila sa lugar kung asa si San Jose.

Sa nianing paagi nagpahinumdom kung unsa kahalangdon ang usa ka pamilya, kay dili mamahimong tawo ang Sto. Niño kung wala ang panabang ni Maria ug Jose.

Ang mensahe lamang ni Fr. Ben sa deboto nga unsa sa tanan sama sa storyang VIVA PIT SENIOR “VIVA” nagpasabot nga mabuhi “PIT” pagsangpit ug “SEÑOR” si Jesus.

Kani lamang nagpasabot nga matag adlaw kinahanglan nga musangpit kita kay Jesus sa panahon nga naglisod ta, sa panahon nga nalipay ta, sa panahon nga nasakit ta, gikapoy ta sa kinabuhi.

Maayo ang paghan-ay nila sa maong fluvial procession ug nasaksihan ang nindot ang dagan sa maong aktibidad ug tanan misunod sa mga lagda sa procession. Nahuman ang Fluvial Procession nga malipayon ug mabungahon ang tanan dala ang gasa nga ilang gipa-ambit alang kay Sto. Niño. (Earna Rose Cadungog | Tagum SoCCom)